PADRIÑOS E MADRIÑAS LECTORES

 Este venres pasado volvemos vivir unha emocionante xornada lectora, gozando padriños, madriñas e afillados da lectura no patio. Á hora indicada cada padriño/madriña pasou a recoller ó seu afillado e levouno a un recunchiño para debullar alí xuntos mil e unha historias, ademais de risas, xogos, borboriños,... Un pracer poder ler para e canda os nosos amigos!

VISITA DE AUTOR 5º E 6º DE PRIMARIA

 Unha veciña de película de Iria Misa foi o libro que este curso ocupou unha chea de horas nas aulas de 5º e 6º. Leron e releron a historia gozando coa súa lectura e preparando o encontro coa súa autora. Por fin chegou o día! O 23 de abril, día do libro, celebraron a data coñecéndoa e falando con ela. Puideron facerlle moitas preguntas e levar nos seus exemplares unha adicatoria personalizada. 

BOCATAS SANOS NO NOSO PDI

 O pasado martes 9 de maio tódolos nenos e nenas do cole recibimos a visita dos monitores de FAI CLIC AO TEU BOCATA. 

 Este programa pretende abondar nas vantaxes para a nosa saúde dunha alimentación sa. Os bocatas mudan os seus ingredientes cotiás por peixes en conserva e verduras que os fan máis apetecibles, sans e sostibles. Abondamos, logo, de xeito experiencial nos obxectivos que persegue o noso PDI anual. Tedes as fotos dos xogos e traballos no blog fonte dos frades

AQUI E AQUI

MARÍA CANOSA NO MES DO LIBRO

 A escritora María Canosa foi a primeira autora en chegar ata a nosa biblioteca neste mes de abril, tan significativo para os libros e os lectores. Os nenos de 3º 3 4º tiveron a sorte de coñecela e falar con ela despois de ler o seu libro Cazadora de estrelas. No blog fonte dos frades tedes a crónica da visita e do interesante que falar con ela dos libros e da escritura literaria. Agardamos xa con ilusión as súas futuras visitas e as das outras autoras que tamén van vir nos vindeiros días.

PODEDES VELO AQUÍ

OS CONTOS DE BENXAMÍN

 Como remate do trimestre e ás portas do mes do libro e do Día internacional do libro infantil, os nenos e nenas de infantil e primeiro recibimos a un contacontos moi especial, Benxamín, quen usou a súa maxia contadora para achegarnos contos e personaxes coma Mori, a nosa coñecida gaivota gourmet, contados dun xeito diferente. Ademáis agasallounos coas súas ilustracións. Gustáronnos moito as que fixo dos nosos amigos Adriana e Lucas que se convertiron en improvisados protagonistas. Que ben o pasamos!

ACTIVIDADES COMPLEMENTARIAS NO NOSO PDI

 Neste 2º trimestre continuamos a realizar moitas actividades complementarias dentro e fóra das aulas relacionadas coa temática traballada no noso PDI.

Podedes coñecelas accedendo as entradas publicadas no outro blog Fonte dos frades.

NATURNOVA 3º E 4º

MUSEO DO MAR 1º E 2º

MUSEO DO MAR INFANTIL

TEATRO NAUTILUS

GOZANDO COA MÚSICA

 No día de onte, fomos todo infantil, 1.º e 2.º de primaria, en varias quendas, á biblioteca para desfrutar cunha actividade de música. O profe Daniel González Troncoso achegouse ó noso cole para presentarnos, co axuda do conto Las clases de tuba, como xoga coas notas este instrumento. Encantounos esta experiencia; da súa man non perdemos detalle, e en canto nos invitaron, non paramos de bailar! Grazas, profe!

INFANTIL

1º PRIMARIA

2º PRIMARIA

UN CONTO EN 5 ANOS. FEDERACIÓN DE XORDOS

 Os representantes da Federación de Xordos visitaron tamén a aula de 5 anos para contar o conto Un culete independiente e presentarlle a todo o mundo da lingua de signos. Unha estupenda experiencia!

A FEDERACIÓN DE XORDOS. 1.º DE PRIMARIA

 Dous representantes da Federación de Xordos visitaron a aula de 1.º e, coa axuda dos Bolechas, explicáronlles un pouco como é a vida dun neno xordo: como espertar, a alarma do cole, o timbre da casa, as explicacións en clase... Pasaron un tempiño moi bo aprendendo moito e descubrindo como se comunican coas mans.

TEATRO EN INGLÉS

 O pasado xoves tivemos a sorte de ir ao teatro. Non tivemos que nos mover do cole, pero atoparnos de novo coa experiencia teatral, tan esquecida durante a pandemia, xa foi todo un cambio. Algúns estrenábanse nestes acontecementos e a emoción notábase moito. 

En dúas quendas dende infantil a 2º de primaria e desde 3º a 6º asistimos a representación de cadansúa obra de teatro en inglés. Wilbur’s Adventure para os máis pequenos e Three Eggs, Two Birds and a King para os maiores . Foron os actores da compañía On Stage Company quen coa mediación de Afundación trouxeron as súas dúas obras ao noso cole.

Aquí podedes ver o que todos gozamos e, por se tiñabades algunha dúbida, fomos quen de seguir e entender perfectamente as historias que nos contaron!.

INFANTIL 1º E 2º

3º, 4º, 5º E 6º

NAVEGANDO POLO ESPAZO

 Os pasados días 11 e 12 de Xaneiro recén chegados das vacacións de Nadal tivemos a gran sorte de embarcar nunha nave aterrada no ximnasio que nos deu un espectacular paseo polo noso sistema solar.

O contrato-programa Ciencia-Innova achéganos esta e outras experiencias que se asoman ó noso cole. Os  que xa tiveramos a oportunidade de facer esta viaxe  hai uns anos estabamos desexando volver  atoparnos co espazo exterior e case tocar os planetas e o sol, aterrar na lúa e mirar a terra dende arriba. E para os que foi a súa primeira experiencia, desfrutaron  e emocionáronse un mundo. En cadanseus grupos burbulla, todos, dende infantil 3 anos ata 6º de primaria, fomos agardando a nosa quenda e unha vez dentro da nave non quixemos perder ningunha información e ningunha emoción. Ogallá podamos repetir pronto!

ACTIVIDADES DE CIENCIA EN 4º DE PRIMARIA

Ciencia en movemento é a actividade que chegou esta semana ata as nosas aulas. Vemos aquí os nenos e nenas de 4º de primaria durante a sesión científica que desfrutaron.

POÑÉNDONOS AO DÍA: ILLAS ATLÁNTICAS.2ºP

    Foi este un trimestre cheo de actividade, aínda que por forza os encontros virtuais foron o que marcou a nosa aprendizaxe e creatividade. Non foron moitas as ocasións nas que tivemos algún encontro persoal, pero habelas hóuboas. Foi o caso dos nenos e nenas de 2º de primaria, quen puideron recibir dous membros do Centro das Illas Atlánticas. No Mes da Ciencia en Galego (e con tódalas precaucións e obrigas por mor da pandemia), puideron gozar das súas explicacións sobre os animais que atopamos nas illas Cíes, tal ourizos mariños, gaivotas ou cobras de escada. Para máis información sobre as novidades deste centro, podedes premer neste enlace.

    Velaquí as fotos que quitaron na nosa biblio.

 

REMATAMOS O 50 ANIVERSARIO

Remata o ano e con el chega a súa fin a celebración do 50 aniversario do cole. Foi un ano moi especial para todos no que fomos quen de converter en contido curricular a nosa propia historia. Puidemos facer moito máis; seguramente quedaron mooitas cousiñas no tinteiro. Un anos non dá para moito máis.O noso labor está xa recollido no blog especial do PDI Párroco 5.0 que podedes ver no lateral. Despedímonos coa presencia do monologuista Avelino González  a quen tivemos o gusto de acoller na nosa biblioteca. 
Grazas a Avelino e grazas a todos por participar connosco nesta celebración.
Podedes ver as fotos da actividade da que xa demos conta no outro blog neste vencello.

LEMBRANDO OUTUBRO...A FESTA DO SAMAÍN

Contos no recuncho da biblio, obradoiro lector compartido, exposición familiar de cabazas, traballiños temáticos nas aulas, baleirado de cabazas, información deste feito cultural noso por parte do equipo de biblioteca e dinamización, disfraces, ...así despachamos a vivencia do Samaín no cole nestes días de outubro tan especiais.

Ademáis en Infantil fixeron obradoiros temáticos nos que os libros e as tradicións tiveron un peso importante. Eles nolo contan...
"Aínda que o Samain xa tinguiu literariamente a semana de celebración do Día das Bibliotecas, os máis pequenos do cole non quedaron satisfeitos. Nos obradoiros de ciclo adicados a esta festa cruzáronse, ademáis da temática do PDI “Dándolle unha volta ao planeta” (todo o mundo sabe que as momias vivintes viaxan ás nosas aulas dende Exipto), o mundo lector e o da ciencia. Un conto moi especial...”O rato Renato e  a avóa cabaciña” traballando habilidades de pensamento, e mailos máxicos experimentos da Doctora Sonia foron as outras dúas sorpresas que agardaban os cativos de infantil nesta mañá de Samaín."

Podemos ver aquí tódalas fotos dos obradoiros

NOVAS ÁRBORES NA ESCOLA

Neste curso 19-20 no que imos dar varias voltas ao mundo e, de paso, ás nosas cabezas, imos comezar polo que temos máis preto, tal como xa vos explicamos a todos e todas na nosa carta de presentación. 
O noso fermoso patio foi o primeiro lugar no que empezamos a traballar. E que mellor que despois da lectura do conto "A árbore da escola" que poidamos engadir dúas árbores máis á nosa longa listaxe.
Un freixo e un bidueiro son as dúas novas amigas que temos no patio grande de herba a carón doutras compañeiras que xa comezan a vestirse de outono. Os nenos de infantil e Primaria asistiron á plantación acompañando a un avó e unha neta moi de noso que nos representaban a todos; a tódolos que formamos parte da vida de Santo André e a todos os que sufrimos os terribles lumes do 2017. Neste esforzo conxunto de facer do noso planeta  un lugar mellor, aqui van dous novos graniños cos que a Comunidade de Montes de Santo André quixo facernos parte desta viaxe de recuperación da nosa paisaxe. As nosas arboriñas xa medran canda nós e a nós tócanos agora coidalas e agarimalas.