Contacontos: Escola de dragóns

Hai tardes que quedan gardadas na memoria porque nos permiten compartir tempo e emocións coas persoas que máis queremos. Nesta nova edición das Tardes de Contacontos en Familia deixámonos inspirar pola historia de Escola de dragóns da man de Donde viven los cuentos.

Queremos agradecer a todas as familias que nos acompañastes unha vez máis. A vosa participación, ilusión e entrega son as que fan posible que cada Tarde de Contactontos se converta nun espazo de encontro, descubrimento e lembranzas compartidas.

Agardamos que estas imaxes vos fagan revivir un anaquiño da aventura e que vos animen a seguir adestrando dragóns... e, sobre todo, a seguir coidando eses vínculos que nos axudan a voar cada día un pouco máis alto.

Contos de ratos en familia!

O pasado xoves gozamos dunha tarde moi divertida grazas aos Ratos de Lonxedetodo da compañía Trinketrinke teatro.

Un rato de biblioteca achegouse ata o Centro Cultural Nautilus e narrou dun xeito moi especial 3 fermosos contos de ratos. 

Con música, palmas e xogos de palabras, grandes e pequenos fomos participando na sesión.

Sen dúbida foi unha tarde moi divertida na que lemos doutra forma. 

Grazas a todos por participar nestas iniciativas de Lectura e Familia!

Ata a próxima!

MES DO LIBRO en FAMILIA

 

Este ano, quixemos celebrar o Mes do Libro en FAMILIA. Durante o mes de abril, e parte de maio, fixemos un especial Lecturas en Familia. Con esta iniciativa, foron pasando polo cole e pola biblio nais, pais e irmás maiores para compartir un ratiño moi especial arredor dos libros. 

As familias do Párroco son estupendas e tivemos moitos voluntarios que se animaron a ler e teatralizar os contos e libros favoritos de cada casa. Dende os máis pequenos ata os maiores do cole gozamos destes encontros. Nunca somos demasiado maiores para que nos lean!

Moitas grazas por vir!

ESCOITAMOS A CHARO PITA EN FAMILIA!

A tarde de onte no Centro Cultural de San Andrés foi moi especial. Xuntas, escola e familia, gozamos da narración oral de Charo Pita. Sen dúbida, este forma parte dos momentos especiais que queremos que viva toda a nosa Comunidade Educativa.

Adiviñas, contos cantados, historias de medo... hai moitísimos recursos nos libros e na nosa imaxinación! Agora tócanos seguir "xogando cos libros" na casa.

Grazas a todas as familias por estar! Vémonos na próxima!

OS CONTOS DE BENXAMÍN

 Como remate do trimestre e ás portas do mes do libro e do Día internacional do libro infantil, os nenos e nenas de infantil e primeiro recibimos a un contacontos moi especial, Benxamín, quen usou a súa maxia contadora para achegarnos contos e personaxes coma Mori, a nosa coñecida gaivota gourmet, contados dun xeito diferente. Ademáis agasallounos coas súas ilustracións. Gustáronnos moito as que fixo dos nosos amigos Adriana e Lucas que se convertiron en improvisados protagonistas. Que ben o pasamos!

SABELA GAGO VISÍTANOS

 Primeiro e segundo de primaria nos seus grupos burbulla e con tódalas medidas de seguridade desfrutaron da visita da contacontos Sabela Gago. Unha experiencia distinta nun curso distinto.

MES DOS LIBROS: TEATRO DE SOMBRAS NA BIBLIO

Este pasado martes 17 de Abril, xa celebrando o mes dos libros, tivemos o pracer de acoller na nosa biblioteca un teatro de sombras moi especial. A compañía "Os asomados" do cole San Rafael fixo dous estupendos pases do conto "O monstro de cores" coa  técnica de  sombras. Fixérono moi  moi ben e puidemos desfrutar moito coa súa montaxe. Non importou que case todos xa coñecesemos o  conto, especialmente os máis pequenos. Durante o tempo que durou a representación ninguén pestanexou!!... é un conto moi especial para todos.
Ademáis despois  puidemos coñecer a tódolos compoñentes do grupo e falar con eles. Tamén puidemos meternos entre "bambalinas" e coñecer o traballo que desenvolveron para poder contarnos o conto dese xeito tan especial.
Foi un pracer, coma sempre é o teatro ben feito, e xa estamos a desexar que volvan coa súa próxima montaxe.

CONTACONTOS DE SABELA GAGO PARA CELEBRAR O COMEZO DO NADAL

Como ven sendo tradicional un curso máis iniciamos as vacación de Nadal invitando ao cole a un contacontos ou similar que nos anime o comezo das festas poñendo un pé no imaxinario dos contos e outro pé no goce de vivir as distintas historias cunha singularidade especial, un pouco mais festiva do que xa normalemente adoita ser o noso achegamento á literatura.

Sabela Gago foi a encargada en varias sesións de poñer este punto final ás actividades colectivas na Biblioteca, traendo ata todos nós- pequenos e maiores- contos diversos e diversos xeitos de contar.

Da súa maleta chea de historias saíu en cada momento o conto que precisaba para chegar mellor a cada grupiño de nenos e daquela todos marchamos satisfeitos e un pouquiño mais apegados á maxia de contar.

OUTRO POETA-CONTADOR DO RÍO MIÑO

Dicir Anxo Moure é dicir Rio Miño, Carballo con botas, Xacia Lubiña, Vicentiño... e outros contiños solidarios.
Dicir Anxo Moure é dicir poesía e un xeito de contar os contos moi especial.
Nós tivemos o privilexio de telo connosco este pasado venres 24 de Marzo na semana na que se deron cita os Días da Poesía, da Árbore e da Auga, coma se fosen ún mesmo. El -bueno él non, o Xacio Pepe- axudounos a pescar contos no Miño coa súa gamela e o seu batuxo; presentounos a unha xacia verdadeira e fíxonos viaxar ao longo do río aprendendo as augas que o enchen, as súas árbores, os seus seres mitolóxicos, os animaliños que nadan, viven ou aniñan  dentro do río ou a carón das súas beiras. Fixo dúas sesións, unha cos mais pequenos e outra cos maiores do cole, e todos pasaron un tempiño estupendo escoitándoo.
Despois visitou as nosas aulas e marchou contento coma un cuco cun agasallo estupendo. A nosa Xacia Miñoncesa quixo marchar con el, quere estar un pouquiño máis preto de Irimia. Agardamos que pronto teñamos novas súas.!!

Mirade aquí a sesión de fotos completa:

visitaanxomourepequenos - Kizoa Editar Videos - Movie Maker

CONTACONTOS DA EDITORIAL ANAYA

A editorial Anaya ven de publicar o conto "Augusta e os seus medos" e o xoves 12 de marzo invitou aos nenos de Infantil e Primeiro de Primaria a unha sesión de contacontos para presentárnolo. Iago foi o encargado de animar este conto de Sabela Fernández Trelles.

Con esta historia tan ben contada, descubrimos que Augusta é unha nena chea de soños, pero por ser tan medrosa non consegue que se cumpran.....ata que pedindo axuda, aprende a superalos enfrentándose a eles. Aqui tendes unha mostra en fotos para que miredes o ben que o pasamos. Despois os nenos de primeiro fixeron un debuxo do que mais lles gustou do conto.

O APRENDIZ DO HOME DO SACO

Un novo contacontos chegou á biblioteca esta derradeira semana escolar do ano 2014. Non queriamos rematar o ano sen volver desfrutar dos libros. 
Daquela o xoves 18 decembro houbo na biblio cáseque unha maratón de contacontos. 
As 10 da mañá empezamos os de infantil e escoitamos, unha vez mais, engaiolados, o conto editado por Anaya de O APRENDIZ DO HOME DO SACO.

Despois como veredes noutra entrada pasaron os compañeiros de 1º e 2º de Primaria a escoitar este mesmo conto e  por último, ás 11"45 a biblioteca encheuse de novo para escoitar o conto QUEN É PAPÁ NOEL.

Na primeira sesión nós -os de infantil- escoitamos atentos un conto que primeiro pensamos nos ía dar medo, pero,...xa se sabe que somos moi valentes e en canto nos deron marcha participamos con entusiasmo. Ao rematar agasallamos ao "contacontos" cun forte aplauso e un improvisado berro (outro, outro!!!). Seica semella que nos gustou moito...