TRABALLAMOS NO PDI NO DÍA DA MULLER

 Podedes ver nesta presentación algunhas das cousiñas que fixemos para visibilizar e celebrar o 8 de marzo, Día da Muller pescudando sobre mulleres sotibles para o bosques e facendo medrar a nosa conciencia feminista e medioambiental. O noso traballo continúa!

MARUXA NO CONTACONTOS DO XOVES

O libro deste mes Maruxa encaixa perfectamente na temática que reivindica o Día da muller, ano tras ano. Nós traémolo ás nosas sesións de animación lectora tanto por esta loita pola igualdade coma porque nos fala da receita do pan. O pan, e os distintos cereais cos que podemos facelo, é alimento básicos e sostible se coidamos o cultivo dos ingredientes e a súa feitura responsable.

Foron Paula e Xulia de 5º de primaria quen nolo trouxo no recreo do xoves pasado.
 

 

CELEBRANDO O DÍA DA MULLER

O Día da muller, coma outras celebracións que temos no cole, non é un día illado. Levamos tempo, en distintos proxectos, dando voz a mulleres de  ámbitos diferentes e a proxectos liderados e traballados por mulleres de xeito compartido cos homes. Coma hoxe nos lembraron no cole, non hai só feminino e masculino; o importante somos ti e máis eu. O importante é traballar pola igualdade e vivir e compartir en tódolos eidos uns canda outras.

Seguindo no traballo que levamos adiante no cole sobre alimentación sostible para nós e para o planeta, centrado na pesca e no agro, hoxe trouxemos ás aulas o labor de Ellen Macarthur, merecedora o pasado ano do premio Princesa de Asturias pola súa loita por implicar a gobernos e industrias no cambio económico que precisamos para darlle a volta ao cambio climático. 

Ellen, a través da súa fundación, quere que os pequenos cambios, - os que todos nós temos que facer no noso consumo- , e mailos grandes cambios, -os que debe facer o tecido económico para mudar á unha economía circular-, sexan xa unha realidade. Non precisamos seguir adiando e discutindo, as solucións están aí e son sinxelas. Precisan só do compromiso de todos. Invitámosvos a navegar por esta temática dende a nosa aula virtual.

Hoxe e os días vindeiros, vencellado todo tamén á celebración da "Semana da prensa", seguiremos matinando nos pasos a dar nas nosas parceliñas  e seguiremos analizando os recursos e a información da que dispomos. E de certo que o camiño xa o temos comezado!.

Para visibilizar o día e que esta mensaxe chegue ás casas fixemos en tódalas aulas distintos marcapáxinas adicados a esta muller e a economía circular. Como adoita suceder, o importante é participar e facer o traballo; e sempre moitos esquecemos facer fotos. Non importa!  Para mostra un botón.  Aquí tedes ós pequenos cos seus marcalibros e o traballo de aproveitamento feito.

E os distintos modelos de marcalibros

Tamén a decoración dunha das portas trouxo ata nós a figura da muller rural, coa colaboración de nenos e nenas de distintos cursos. Representárona recollendo os grelos que cultivou para facer o seu caldo! Non podía ser doutro xeito! Alimentación sana e da nosa terra!

INFANTIL 3 E 4 ANOS, 4.º DE PRIMARIA E O DÍA DA MULLER

 Os nenos e nenas de 3 e 4 anos e de 4.º de primaria remataron xa o seu traballo sobre as mulleres invisibles, dándolle voltas ao lema Pómoslle un bigote?

As elixidas en 3 anos foron KAREN JOHNSON, JOCELYN BELL, MARIAM MIRZAHJANI e LISE MEITNER. Como podedes imaxinar, son as dúas primeiras, matemáticas relacionadas coa astronomía, as que máis lles gustaron. Os peques sacaron a súa parte artística e deixáronas moi feitiñas.

Despois, entre todos, pegaron a información e colorearon como puideron.

Os de 4 anos tamén elixiron a Karen ou Katherine Johnson. Non podían deixar de coñecer a persoa que axudou a trazar o camiño que tiña que seguir o Apolo XI para chegar ata a Lúa.

Os de 4.º de primaria pescudaron sobre Ada Lovelace. Moi implicados no uso das tecnoloxías, investigaron os problemas que tivo Ada ata converterse na primeira programadora da historia.

8 DE MARZO. DÍA DA MULLER

 Neste día tan especial andamos todos as voltas co noso "caderno de científicas" co que queremos facer unha escolma dalgunhas das mulleres destacadas na historia da ciencia, en xeral, e da mediciña e bioloxía en particular. Son mulleres de onte e de hoxe. Mulleres que puxeron os alicerces e mulleres que hoxe seguen o seu ronsel.

Esta é tamén a nosa homenaxe a todas aquelas mulleres que apoiaron e apoian os coidados e a investigación nesta pandemia. Todas elas forman parte de equipos de colaboración de homes e mulleres nos que quixeron - e queremos- ser partícipes, ao mesmo nivel e dando o protagonismo "ós e as" que o teñen; sen esquecer a ninguén polo seu xénero. Aínda que hoxe traiamos aquí só ás mulleres...

Nós estamos a facer o noso traballo nas aulas. Vós se queredes podedes tamén entretervos e informarvos coñecendo estas mulleres especiais. Son só unha pequena parte das moitas que traballan nos laboratorios e das moitas heroínas anónimas dos hospitais e os ambulatorios.

A tódalas que hoxendía pescudan e actúan contra o coronavirus todo o noso agradecemento

CIENCIA E MULLERES

MARGARITA SALAS                                                      VIRÓLOGA

MARÍA BLASCO                                                              VIRÓLOGA

ÁFRICA GONZÁLEZ                                                       INMUNÓLOGA

ALICIA ESTEVEZ TORANZO (GAL)                            MICROBIÓLOGA

MARISOL SOENGAS GONZALEZ (GAL)                    MICROBIÓLOGA

VANESA VALDEIGLESIAS GARCÍA (gal)                    BIÓLOGA

ISABEL ZENDAL (GAL)                                                  ENFERMEIRA      

MARGARITA DEL VAL                                                  VIRÓLOGA

LORENA SÁNCHEZ-FELIPE                                          INVESTIGADORA    VACINAS

ISABEL SOLA                                                                   INVESTIGADORA    VACINAS

ANA FERNÁNDEZ SESMA                                            VIRÓLOGA

NURIA OLIVER                                                                ENXEÑÉIRA DE DATOS

NEREA IRIGOYEN                                                          VIRÓLOGA

PILAR MARCO                                                                 FARMÁCÓLOGA NANOTECNÓLOGA

MARÍA RODRÍGUEZ                                                       BIÓLOGA COMPUTACIONAL

CAROLINA VIDAL                                                           MÉDICA

MONTSERRAT BÁRCENA                                              INVESTIGADORA COVID

ROSA MENÉNDEZ                                                         PRESIDENTA CSIC                                           

SARA BERTRÁN DE LIS                                                  INVESTIGADORA COVID

ROCÍO SILLERAS                                                              INVESTIGADORA COVID

Nas seguintes entradas iremos dándovos conta das nosas pescudas e traballos.

LEMBRANDO...8 DE MARZO: DÍA DA MULLER

A concorrencia da Semana da Prensa  coa celebració do Día da muller tinguiu o traballo feito con tintes especialmente xornalísticos.

Estas foron as propostas que se fixeron as aulas:

-Procurar novas da prensa sobre o acontecemento do 8 de marzo e reflexionar nas aulas sobre o seu por qué e a súa trascendencia.

- Elaborar carteis ou presentacións dixitais coas novas recollidas e aspectos delas que lles chamasen a atención. Outra posibilidades é  elaborar cos nenos  unha listaxe cos aspectos principais da situación social actual e o que se quere conseguir. Tamén podedes facer un cartel cunha destas reinvidicacións e posibles solucións comentadas nun texto xornalístico elaborado polos nenos.

-A educación  da muller nos últimos 50 anos. Podedes consultar textos de prensa dixital que están na pestana do blogue e elaborar unha liña de tempo cos cambios que se foron producindo. 

- Novas diversas sobre mulleres: Recollida de novas de prensa sobre mulleres diversas e colocación das mesmas ou de traballiños sobre elas nas portas das aulas ou nas paredes próximas.

A biblioteca acolleu un recuncho especial de prensa e un expositor sobre igualdade e visibilidade das mulleres para servir de base a o traballo das aulas.

25 DE NOVEMBRO

Velaquí a nosa proposta  -recollida de distintas suxerencias que estes días nos veñen chegando-  para mais dun día de reflexión nas nosas aulas sobre a situación das mulleres na nosa sociedade. E tempo de preparar aos nenos e as nenas cara unha sociedade distinta onde a igualdade  e o respeto entrambolos dous sexos sexan un feito, e non unha declaración de intencións.

OUTRA LECTURA DE MULLERES QUE QUEDOU ATRÁS

Tiveramos algún problemiña coas fotos das lecturas sobre mulleres, pero por fin xa vos podemos amosar as que faltaban. 
"Audrey Hepburn" completou a serie contada co gallo do Día da muller traballadora. Foron, as que viñeron á nosa biblioteca, mulleres especiales polo que fixeron no seu tempo. Non foron as únicas, pero elas coma outras tantas deixaron un ronsel tras do que moitas outras continuaron camiño.

FOTOS PROMETIDAS DOS CONTACONTOS ADICADOS Á MULLER.

Nos contacontacontos do mes de marzo adicados ao Día da muller traballadora Martina e Cata de 2ºde Primaria presentáronnos a Cocó Chanel.

Ainhoa e Javi de 4º de Primaria achegáronnos á figura de Frida Kahlo e fixéronnos desfrutar moito da súa lectura.