AS RECEITAS RECOLLIDAS NO PDI

 Procuramos a alimentación sa e como bos cociñeiros fomos recollendo receitas das familias. Aqui tedes unha presentación coas que recollemos en galego, castelán e inglés

LEMBRANDO: 4º e a ciencia

 Son moitas as actividades científicas que estes nenos e nenas desenvolveron durante o curso, ademais de todo o traballo que fixeron para o PDI. Estas son algunhas delas.

No mes de Xaneiro e aproveitando a temática do PDI de coidado do planeta pescudaron nos seus problemas, ao tempo que lían o libro do proxecto "Patios verdes, residuos cero" Non é máis ca un.

Tamén fixeron unhas pescudas sobre inventos e inventores

BOCATAS SANOS NO NOSO PDI

 O pasado martes 9 de maio tódolos nenos e nenas do cole recibimos a visita dos monitores de FAI CLIC AO TEU BOCATA. 

 Este programa pretende abondar nas vantaxes para a nosa saúde dunha alimentación sa. Os bocatas mudan os seus ingredientes cotiás por peixes en conserva e verduras que os fan máis apetecibles, sans e sostibles. Abondamos, logo, de xeito experiencial nos obxectivos que persegue o noso PDI anual. Tedes as fotos dos xogos e traballos no blog fonte dos frades

AQUI E AQUI

OS DE 4º SEGUEN A SÚA ROLDA DE CONTACONTOS

 Os nenos e nenas de infantil 1º e 2º gozamos unha xeira máis de contacontos na hora de ler. Desta volta o xoves e mailo venres escoitamos a dous grupos de 4º que nos contaron as historias de Bruno e de Rot. 

Primeiro foi a quenda de Candela, Lara e Daniela, lectoras xa de O gato lambón nas semanas pasadas, que leron  Bruno. Despois foron Sabrina e Lucas os que se atreveron con Rot el más guapo del mundo. Fixérono moi ben e gustáronnos moito ambolos dous contos.

ROT 

TEATRO EN INFANTIL

 Como adoitabamos facer antes da pandemia, este xoves tódolos cativos de infantil fomos ao teatro da fundación a gozar coa maxia do teatro. Feo foi a obra coa que nos agasallou un único actor que fixo desfilar diante nosa unha morea de parrulos para contarnos unha particular interpretación do conto clásico O parrulo feo. Con ela aprendemos a importancia da diversidade. Foi unha interpretación un chisquiño dificil para nós, pero fomos quen de gozar coa atmosfera de cores, luces e efectos especiais que nos chegaban dende o escenario. Abofé que, malia dificultade da historia, pagou a pena a viaxe! Dende agora non quereremos só parrulos amarelos, senón de tódalas cores!

SEGUEN AS VISITAS DE AUTORES

 O venres 21 de abril e mailo luns 24 visitaron a nosa biblioteca os autores Sabela Fernández Trelles e Xabier Domínguez. Estas visitas  poñen fin a un longo traballo lector que abrangue dende principio de curso ata este treceiro trimestre e mes do libro no que a xuntanza coas persoas que pensaron e deron forma ás historias ofrécenos unha nova perspectiva da lectura.

Sabela é a autora  do libro  O ladrón de soños lido este curso polos nenos e nenas de 1 º e 2º.

Xabier é co-autor, canda Alba de Evan Freijedo, do libro Maxia de pedra lido polos rapaces de 5º e 6º. Ao mesmo que con María Canosa todos gozaron coñecendo os escritores e compartindo con eles anécdotas, faceres e emocións arredor destes e doutros libros.

ANIMACIÓN LECTORA FEITA POLOS NENOS

O gato lambón vén de sé-lo escollido para a animación lectora desta semana.  Marisa Nuñez, Patacrúa, protagonista canda Eva Mejuto do Día das escritoras deste curso, segue a alumear coas súas creacións as nosas xeiras lectoras. Candela, Lara e Daniela de 4º de primaria ofreceron o xoves e o venres no contacontos do recreo e nas horas de ler varias representacións da súa dramatización deste conto. Os visitantes da biblio e mailos nenos e nenas de infantil, primeiro e segundo  gozarón un mundo con elas. 

MARÍA CANOSA NO MES DO LIBRO

 A escritora María Canosa foi a primeira autora en chegar ata a nosa biblioteca neste mes de abril, tan significativo para os libros e os lectores. Os nenos de 3º 3 4º tiveron a sorte de coñecela e falar con ela despois de ler o seu libro Cazadora de estrelas. No blog fonte dos frades tedes a crónica da visita e do interesante que falar con ela dos libros e da escritura literaria. Agardamos xa con ilusión as súas futuras visitas e as das outras autoras que tamén van vir nos vindeiros días.

PODEDES VELO AQUÍ

DÍA DOS BOSQUES E DA ÁRBORE AO LONGO DO MES.

 Infantil celebrou o día da árbore plantando o castiñeiro que vimos coidando dende hai un ano. A nosa arboriña medrou xa o suficiente para ocupar un espazo no noso xardín. Non o dubidamos, procuramos un sitio para ela e puxémonos cos sachiños a facer un gran burato para plantala.

Ademais neste curso xerminamos sementes de maceira, aguacates e chibilis que xa estaban preparados, case todos,  para viaxar as nosas casas. Os que aínda son moi pequenos quedaron na aula para non perderlle a pista. Fomos todos coas arboriñas moi ledos e agardamos que na casa sigamos a darlle bos coidados.

Coma este 21 de marzo tamén era o día da Poesía os de 4 anos inventaron, mentres plantabamos o castiñeiro no xardín, un poemiña contando a nosa experiencia. Sementamos ao tempo poesía e árbores.

POEMIÑA 1,2,,4 TEMOS ARBORIÑA XA!

Os contos que todos estes días estivemos a ler e algún que lemos especialmente para esta xornada completaron a celebración. Ademais quixemos gravar na radio as nosas lerias deste día.

En canto deixou de chover foron os nenos de 5º e 6º os que puideron gozar desta celebración camiñando ata os montes de Santo André e poñendo os seus granciños de solidariedade para previr o desastre dos lumes. Podedes velos aquí.

OS CONTOS DE BENXAMÍN

 Como remate do trimestre e ás portas do mes do libro e do Día internacional do libro infantil, os nenos e nenas de infantil e primeiro recibimos a un contacontos moi especial, Benxamín, quen usou a súa maxia contadora para achegarnos contos e personaxes coma Mori, a nosa coñecida gaivota gourmet, contados dun xeito diferente. Ademáis agasallounos coas súas ilustracións. Gustáronnos moito as que fixo dos nosos amigos Adriana e Lucas que se convertiron en improvisados protagonistas. Que ben o pasamos!

MES DA POESÍA

 Celebramos o Mes da poesía dando apertura a nosa tradicional solta poética que podemos subir ao muro dixital ou colocar nos muros e  nos corredores do cole. Poemas propios e de distintos autores que van encher de emocións as nosas lecturas e creatividade. Animádevos!

MARUXA NO CONTACONTOS DO XOVES

O libro deste mes Maruxa encaixa perfectamente na temática que reivindica o Día da muller, ano tras ano. Nós traémolo ás nosas sesións de animación lectora tanto por esta loita pola igualdade coma porque nos fala da receita do pan. O pan, e os distintos cereais cos que podemos facelo, é alimento básicos e sostible se coidamos o cultivo dos ingredientes e a súa feitura responsable.

Foron Paula e Xulia de 5º de primaria quen nolo trouxo no recreo do xoves pasado.
 

 

CELEBRANDO O DÍA DA MULLER

O Día da muller, coma outras celebracións que temos no cole, non é un día illado. Levamos tempo, en distintos proxectos, dando voz a mulleres de  ámbitos diferentes e a proxectos liderados e traballados por mulleres de xeito compartido cos homes. Coma hoxe nos lembraron no cole, non hai só feminino e masculino; o importante somos ti e máis eu. O importante é traballar pola igualdade e vivir e compartir en tódolos eidos uns canda outras.

Seguindo no traballo que levamos adiante no cole sobre alimentación sostible para nós e para o planeta, centrado na pesca e no agro, hoxe trouxemos ás aulas o labor de Ellen Macarthur, merecedora o pasado ano do premio Princesa de Asturias pola súa loita por implicar a gobernos e industrias no cambio económico que precisamos para darlle a volta ao cambio climático. 

Ellen, a través da súa fundación, quere que os pequenos cambios, - os que todos nós temos que facer no noso consumo- , e mailos grandes cambios, -os que debe facer o tecido económico para mudar á unha economía circular-, sexan xa unha realidade. Non precisamos seguir adiando e discutindo, as solucións están aí e son sinxelas. Precisan só do compromiso de todos. Invitámosvos a navegar por esta temática dende a nosa aula virtual.

Hoxe e os días vindeiros, vencellado todo tamén á celebración da "Semana da prensa", seguiremos matinando nos pasos a dar nas nosas parceliñas  e seguiremos analizando os recursos e a información da que dispomos. E de certo que o camiño xa o temos comezado!.

Para visibilizar o día e que esta mensaxe chegue ás casas fixemos en tódalas aulas distintos marcapáxinas adicados a esta muller e a economía circular. Como adoita suceder, o importante é participar e facer o traballo; e sempre moitos esquecemos facer fotos. Non importa!  Para mostra un botón.  Aquí tedes ós pequenos cos seus marcalibros e o traballo de aproveitamento feito.

E os distintos modelos de marcalibros

Tamén a decoración dunha das portas trouxo ata nós a figura da muller rural, coa colaboración de nenos e nenas de distintos cursos. Representárona recollendo os grelos que cultivou para facer o seu caldo! Non podía ser doutro xeito! Alimentación sana e da nosa terra!

ROSALÍA EN INFANTIL E PRIMARIA

 As bonequiñas viaxeiras de Rosalía chegaron xa a moitas casas transportando o poema Miña casiña meu lar que é o centro do traballo rosaliano neste curso, vencellado ó traballo do noso PDI. Podedes ver as fotos que xa temos nestas entradas do noso blog fonte dos frades. Son moitos máis os cursos que fixeron a a súa Rosalía, pero  esqueceron facer fotos. Non pasa nada; xa sabemos que o importante é participar!

AQUI E AQUI

DÍA DE ROSALÍA. PROPOSTA PARA AS FAMILIAS

  O 23 de febreiro celebramos o Día de Rosalía de Castro, aniversario do seu nacemento. Neste curso, mergullados no noso PDI arredor da alimentación sana e sostible, acáenos moi ben traballar co seu poema Miña casiña, meu lar onde fala do caldiño de gloria e doutra elaboración tradicional, o bolo do pote. Nós imos traballar todas estas cousiñas nas aulas no que queda de trimestre e no vindeiro. Invitámosvos a participar desta receita connosco: 

Elaborade un caldiño de gloria ou o caldo galego que acostumades a facer e amosádenolo nunha foto ou vídeo. Ao mesmo tempo escollede uns versos do poema e escribídeos ou recitádeos.

Podedes se queredes pescudar tamén na elaboración do bolo de pote e cociñalo ou pasarnos a receita. Aquí tedes o anuncio da invitación que vos facemos. Non hai límite de tempo. Podedes participar no momento do curso que queirades.

UN MAR DE CONTOS, TRABALLANDO POLA NON VIOLENCIA CONTRA A MULLER

 Educar na igualdade é a mellor aportación que podemos facer dende as nosas aulas. A proposta deste curso ía da man dos clásicos; no noso caso, o conto de Brancaneves. 

Brancaneves e os 77 ananiños dálle a historia unha especial reviravolta facendo subir cara a superficie eses estereotipos que moitas veces aínda non temos abandonado. Sobre todos eles íamos falar nas aulas, ademais de ler este e outros contos sobre o tema, escollidos no noso expositor do "25 de novembro".

Tódalas  aulas quixemos  poñer o noso granciño, e seguiremos facéndoo, visibilizando e reflexionando sobre todo o que acontece coas mulleres, aínda que moitas non lembrásemos facer fotos.

Aquí deixamos algún exemplo do traballado nas aulas neste día. Esto non remata aqui. É unha loita de longa distancia que non podemos deixar abandonada

.

Os pequenos de infantil e 3 e 4 fixeron corazóns lilas e un marcalibros adicado a unha muller moi importante para todos, a nosa nai. Tamén gozaron da lectura do conto Rosa Caramelo e aproveitaron para comparar as peles e comprobar que todos somos iguais.

Na aula de 5 leron Brancaneves e os 77 ananiños.

Os nenos de 2º leron Arturo e Clementina. Leron, viron un vídeo, falaron sobre el e pensaron diferentes finais para o conto. Aproveitaron para falar sobre as cores azul e rosa e a súa imposición dende bebés, dos xoguetes que se anuncian para nenos ou nenas,... foi unha actividade que deu moito de sí.

Os nenos e nenas de 6º traballaron no deseño de carteis para visibilizar este día.

Na biblioteca, o contacontos semanal acolleu O segredo de Flora lido por Thiago e Maira. Éste é un conto que intenta explicar como agroma a violencia nalgúns de nós e a importancia de aprender a xestionar esa emoción negativa. A violencia contra a muller ten moitos matices e causas que todos, nós e a sociedade temos que tratar e analizar para desbotala do noso día a día. Traballar as emocións negativas, comprender por que están aí, por que as expresamos contra as/os que coidamos máis débiles é un xeito de avanzar cara ese rexeitamento e normalizar a convivencia e a igualdade como únicos camiños.

.