POESÍA ROBÓTICA: A CABALO ENTRE A POESÍA E AS PROPOSTAS STEM

 Os nenos e nenas de 6.º de primaria participaron na proposta do PDI xuntando poesía e tecnoloxía. Construíron, facendo os seus cálculos matemáticos, dous grandes taboleiros para o robot nos que foron ilustrando as diferentes celas cos versos de dous poemas de Antón García Teijeiro. Cando todo estivo rematado, puideron ler roboticamente o poema dándolle as ordes precisas. Toda unha experiencia de lectura diferente!

PADRIÑOS E MADRIÑAS LECTORES

 Despois de dous cursos sen podermos celebrar esta preciosa actividade e despois de darlle voltas á data por ver que o tempo acompañase, quedou para a mañá de fin de curso esta sesión de padriños e madriñas lectoras. Era a nosa derradeira actividade de biblioteca antes de lanzármonos a festa de remate das clases.

 Dende días antes estivemos cos preparativos: coñece-los nosos padriños, madriñas, afillados e afilladas, preparar pequenos agasallos para eles, escoller os contos e practicar lectura dramatizada...

 Chegado o día, a chuvia foi a nosa compañeira. O sol non quixo saír a enxoita-la herba e non puidemos gozar lendo no marabilloso xardín que temos. Houbemos de quedar todos no patio cuberto, onde si que puidemos escoita-lo murmurio de mil e unha lecturas simultáneas.

XOGO INTERACTIVO "QUEN É QUEN"

 Xa está dispoñible o xogo interactivo Quen é quen, elaborado co material feito polas aulas no Día da Muller en marzo (os carteis de mulleres invisibles) e co preparado agora, neste trimestre (as biografías de científicos da historia feitas para o noso xornal Don Moucho). 

 Xa podemos aproveitar para seguir a aprender e a xogar coa ciencia!! Dentro do xogo hai ligazóns ás presentacións elaboradas pola biblio cos carteis de científicos e científicas.

Agardamos que vos guste.

AS RIMAS DOS DE 5 ANOS

 

17 DE MAIO. DÍA DAS LETRAS GALEGAS

 Hoxe é o Día, aínda que xa hai moito tempo que as institucións e os coles andamos na tarefa de coñecer o escritor ao que se lle adica o Día neste curso.

 E vós? Sabedes quen é Florencio Delgado? Foi un poeta que naceu en Córgomo, nas terras de Valdeorras. Na súa obra cantou as louvanzas de Galicia e defendeu a nosa lingua e cultura. 

 Achegádevos hoxe a el a través da música. Son moitos os músicos e cantantes que lles poñen voz e son ás composicións de don Florencio. Os de infantil bailamos arredor do maio o poema que fixo para este primaveral mes. 

 Podedes coñecer a súa vida e ler moitos poemas na nosa aula virtual e no blog Fonte dos frades. Velaquí (Salve!) vos deixamos unha das poesías que mellor acae no día de hoxe. 

5 ANOS PRESENTA... "EXIPTO, A SÚA CULTURA E CIENCIA"

Dentro das actividades do noso PDI anual, Pedra a pedra, unha ollada ás orixes da ciencia, os nenos e nenas de 5 anos gravaron na radio o seu podcast para contarnos todo o que aprenderon.

                                                            LIGAZÓN AO PODCAST

SUXESTIÓNS LECTORAS EN 4.º DE PRIMARIA

 

MÁIS RELATOS CON PORTADAS

 Os nenos e nenas de 4.º seguen a compoñer relatos cos títulos de varios contos. Achégannos uns poucos máis. Estupendo!

SUXESTIÓNS LECTORAS EN 6.º DE PRIMARIA

 Os nenos e nenas de 6.º de primaria querían ser os primeiros en compartir con todos as súas suxestións. Hai tempo que colleron os seus libros e fixeron as fotos para que non lles pasase o día. Agora xa é hora de contarvos cales son os seus libros preferidos.

"PEDRA A PEDRA...". PODCAST DE SUXESTIÓNS LECTORAS DE 3.º DE PRIMARIA

 Escoitamos os cativos e cativas de 3.º de primaria falándonos dos seus libros favoritos.

SUXESTIÓNS LECTORAS

Moitas grazas polas vosas suxestións. Tomamos nota!

"PEDRA A PEDRA...". IMOS CELEBRANDO A FESTA DOS LIBROS!

 Comenzan a chegar as primeiras actividades de celebración do Mes do Libro. Xusto a tempo! Mañá, 23 de abril, é o día de referencia para as letras e os libros.

 Os nenos e nenas de 4.º fan súa a proposta de contar historias a partir dos títulos dos contos e achégannos as tres primeiras historias.

Parabéns rapaces! Son unhas historias estupendas!

VIDEOPOEMA EN 2.º DE PRIMARIA

 

SEMANA DA POESÍA

 Estamos a celebrar dende o luns 21 de marzo, Día da Poesía,  a tradicional Semana da Poesía. Antes da pandemia, as nosas paredes, escaleiras e calquera recunchiño dentro ou fóra do cole enchíanse de versos e poemas propios ou alleos. Agora son os muros virtuais os que nos serven para compartir poesía. Dende esta semana, e deica a fin do trimestre, as nosas aulas e este muro virtual van encherse de textos poéticos que podemos ler, copiar, ilustrar e mesmo crear.  

 Podedes coñecer o que estamos facendo nas distintas aulas axexando nesta xaneliña virtual; e se vos apetece, podedes tamén compartir os poemas que vos gustan ou que imaxinedes. Premede no cadradiño con frecha do recuncho superior dereito para ver o muro nunha xanela grande; ou no lápiz inferior, se queredes compartir algo poético.

RECITANDO EN 3 ANOS

 

PRIMEIRO PRESÉNTANOS AS SÚAS MULLERES INVISIBLES

 Os nenos e nenas de primeiro informáronse de toda a problematica arredor das mulleres científicas que estivemos barallando na celebración do 8M e en grupos pescudaron os logros de catro destas mulleres: KAREN JOHNSON, HIPATIA DE ALEXANDRÍA, ROSALIND FRANKLIN e mais  ADA LOVELACE. 

Completaron a súa actividade xogando co dominó da igualdade.

VISITA DO HEMATOCRÍTICO Á NOSA ESCOLA

 O Hematocrítico, autor do libro Vaia Cabuxiño!, editado por Edicións Xerais, visitou onte a nosa escola para se reunir cos nenos e nenas de 1.º e 2.º (que leron este libro como parte do Plan Lector deste curso).

 Atentos ás explicacións, todos agardaron o intre máis esperado: a sinatura do autor en cadanseu exemplar. A ilustradora Mar Villar tiña prometida a visita, pero non puido vir. Esta foi a súa primeira vez neste tipo de xuntanzas que nos achegan os contos e a literatura dende outro punto de vista.

TEATRO EN INGLÉS

 O pasado xoves tivemos a sorte de ir ao teatro. Non tivemos que nos mover do cole, pero atoparnos de novo coa experiencia teatral, tan esquecida durante a pandemia, xa foi todo un cambio. Algúns estrenábanse nestes acontecementos e a emoción notábase moito. 

En dúas quendas dende infantil a 2º de primaria e desde 3º a 6º asistimos a representación de cadansúa obra de teatro en inglés. Wilbur’s Adventure para os máis pequenos e Three Eggs, Two Birds and a King para os maiores . Foron os actores da compañía On Stage Company quen coa mediación de Afundación trouxeron as súas dúas obras ao noso cole.

Aquí podedes ver o que todos gozamos e, por se tiñabades algunha dúbida, fomos quen de seguir e entender perfectamente as historias que nos contaron!.

INFANTIL 1º E 2º

3º, 4º, 5º E 6º

FACENDO A CARTA PARA OS REIS

 Non podiamos marchar sen deixar na caixa de correos as nosas cartas para os Reis Magos. Como xa non poden vir e enviar os seus paxes ao cole, por mor da pandemia, quixeron lembrarnos que non esquecerán pasar polas nosas casas, e fixérono deixando unha mensaxe en audio. Os de infantil quixeron axudarlles preparando entre todos a caixa de correos. Mentres, tódolos nenos e nenas das distintas aulas traballaron arreo escribindo as súas cartas.

CONTACONTOS NO NADAL

 Despedimos o trimestre lendo cos amigos. Os nenos de 5º e 6º de primaria deron unha volta por tódalas aulas agasallándonos con lecturas de Nadal. Homiño de mazapán, Cando Martiño tivo gañas de mexar na noite de reis, Elmer e o Nadal, Antón e o Apalpador... foron os escollidos nesta nova rolda de contacontos animados polos maiores do cole.