Contacontos: Escola de dragóns

Hai tardes que quedan gardadas na memoria porque nos permiten compartir tempo e emocións coas persoas que máis queremos. Nesta nova edición das Tardes de Contacontos en Familia deixámonos inspirar pola historia de Escola de dragóns da man de Donde viven los cuentos.

Queremos agradecer a todas as familias que nos acompañastes unha vez máis. A vosa participación, ilusión e entrega son as que fan posible que cada Tarde de Contactontos se converta nun espazo de encontro, descubrimento e lembranzas compartidas.

Agardamos que estas imaxes vos fagan revivir un anaquiño da aventura e que vos animen a seguir adestrando dragóns... e, sobre todo, a seguir coidando eses vínculos que nos axudan a voar cada día un pouco máis alto.

O club de lectura sobe ao escenario

O club de lectura puxo o broche final ás súas actividades cunha proposta moi especial: converter os libros en teatro.

Despois de semanas compartindo lecturas e descubrindo diferentes obras teatrais, o alumnado participante preparou a representación dalgúns capítulos e escenas dos libros lidos. Ademais de practicar a lectura expresiva, tiveron que traballar a interpretación, a expresión corporal e o traballo en equipo para dar vida aos personaxes.

A actividade encheu a biblioteca de emoción, creatividade e moitas ganas de actuar. Cada grupo achegou a súa propia visión das historias, facendo que as escenas resultasen divertidas, emocionantes e moi orixinais.

Con esta experiencia, o alumnado puido comprobar que ler teatro tamén é unha maneira fantástica de vivir os libros desde dentro, entendendo mellor os personaxes e gozando da lectura dun xeito diferente e participativo.

Parabéns a todos e todas polo excelente traballo realizado e por facer deste final de club de lectura unha celebración tan especial da lectura e do teatro.

Nova invitación! Contacontos en familia!

 

O próximo venres 5 temos unha nova cita lectora no Centro Cultural Nautilus de San Andrés de Comesaña!

Desta vez, dende Donde viven los Cuentos chega un contacontos para gozar en familia.

Agardamos por vós!

Encontro coa autora Eva Mejuto

Tivemos a sorte de recibir a visita da autora Eva Mejuto, nun encontro moi especial arredor da lectura e da creación de historias.

O alumnado de 3º e 4º de Primaria puido compartir impresións sobre o libro Queco e Kika, unha histora chea de aventuras, humor e personaxes entrañables que gozaron moito ao longo da lectura.

Pola súa parte, os nenos e nenas de 5º e 6º comentaron coa autora a obra O día no que choveron catro gatos, unha historia sorprendente e divertida que deu pé a interesantes reflexións e preguntas.

Durante a visita, Eva Mejuto falou do seu traballo como escritora, explicou como nacen as súas historias e respondeu con moita proximidade e cariño ás preguntas do alumnado, que participou con gran interese e entusiasmo.

Foi unha experiencia moi enriquecedora que nos permitiu achegarnos un pouco máis ao mundo dos libros e descubrir todo o que se agocha detrás da creación dunha obra literaria.

Moitas grazas a Eva Mejuto pola súa visita e por compartir connosco a súa paixón pola lectura e pola escrita.

Contos de ratos en familia!

O pasado xoves gozamos dunha tarde moi divertida grazas aos Ratos de Lonxedetodo da compañía Trinketrinke teatro.

Un rato de biblioteca achegouse ata o Centro Cultural Nautilus e narrou dun xeito moi especial 3 fermosos contos de ratos. 

Con música, palmas e xogos de palabras, grandes e pequenos fomos participando na sesión.

Sen dúbida foi unha tarde moi divertida na que lemos doutra forma. 

Grazas a todos por participar nestas iniciativas de Lectura e Familia!

Ata a próxima!

A biblio invítavos ao teatro en familia!

Queridas familias, 

Como actividade do programa Lectura e Familias, o XOVES 21 de maio ás 18:00 poderemos gozar dun espectáculo teatral no centro cultural Natutilos de San Andrés de Comesaña. 

A actividade é para asistir e gozar en familia: as crianzas deberán ir acompañadas de pais, nais, avós, avoas...

Esperámosvos! 

MAIO: Que lemos?

O mes de maio chega á biblioteca cargado de propostas para descubrir historias, emocións e arte a través dos libros.

15 de maio: Día Internacional das Familias

Con motivo do Día Internacional das Familias, prepararemos un expositor especial con libros relacionados coas familias.

Será unha boa oportunidade para compartir lecturas sobre afectos, diversidade e convivencia, descubrindo historias nas que recoñecerse e descubrir diferentes modelos familiares.

Entre os títulos seleccionados estarán obras como:

18 de maio: Día Internacional dos Museos

Este mes tamén recomendamos especialmente a lectura de El museo para conmemorar o Día Internacional dos Museos. 

Para completar a experiencia, podemos realizar tamén pequenas visitas virtuais a espazos emblemáticos relacionados coa arte e a arquitectura do noso querido Gaudí:

• Casa-museo Gaudí
• Sagrada Familia (visita virtual)
• Palau Güell

Ademais, atopamos un pequeno expositor con outros libros relacionados coa arte, os museos e a creatividade para seguir descubrindo historias… e artistas.

Sant Jordi cobra vida na nosa biblio

Na biblioteca escolar vivimos unha xornada moi especial arredor da lenda de Sant Jordi. 

Despois de coñecer e ler esta fermosa historia tradicional, o alumnado de 4º púxose mans á obra para dar vida aos personaxes creando os seus propios monicreques.

Coas súas creacións prepararon pequenas representacións da lenda, converténdose en auténticos actores e actrices por un día.

O máis divertido foi comprobar como, en ocasións, a historia cambiaba o seu rumbo: algúns grupos decidiron modificar o final da lenda, ofrecendo versións sorprendentes, divertidas e moi orixinais. Houbo dragóns amigables, princesas valentes e finais cheos de humor e amizade.

Compartimos aquí os vídeos das representacións para que poidades gozar do gran traballo realizado polo alumnado.

Parabéns a todos e todas pola vosa creatividade, ilusión e excelente traballo en equipo!

Vídeo grupo 1

Vídeo grupo 2

Vídeo grupo 3

Vídeo grupo 4

Teatro no noso club de lectura!

No noso club de lectura estamos a vivir unha experiencia moi especial: achegámonos ao xénero teatral!

A diferenza doutros libros que lemos anteriormente, o teatro invítanos a mergullarnos nas historias dunha maneira máis activa e participativa. Un dos aspectos que máis estamos a gozar é a posibilidade de facer lecturas dramatizadas. Ao repartir os personaxes e ler en voz alta, convertémonos por un intre en actores e actrices, dando vida aos diálogos e ás emocións da obra. Isto axúdanos non só a comprender mellor o texto, senón tamén a sentir con máis intensidade o que lles acontece aos personaxes.

As risas, os momentos máis intensos e mesmo os pequenos erros forman parte dunha aprendizaxe compartida que nos une como grupo.

En definitiva, ler teatro no club de lectura está a ser unha experiencia moi enriquecedora e divertida, que nos permite descubrir a literatura desde outra perspectiva moito máis viva e creativa.

Celebramos o Día do Libro coa lenda de Sant Jordi

Este ano, con motivo do Día do Libro, na nosa biblioteca mergullámonos nunha das historias máis coñecidas da tradición europea: a lenda de Sant Jordi.

Para achegarnos a ela dun xeito especial, escollemos o álbum “¡Qué historia tan bestia, minimoni!” de Rocío Bonilla. Un conto que recupera esta historia clásica pero engadindo unha mirada actual e crítica. A través das súas páxinas, non só coñecemos a historia do cabaleiro, o dragón e a princesa, senón que tamén reflexionamos sobre cuestións moi interesantes:
> As princesas necesitan ser salvadas?
> Por que cambian os contos co paso do tempo?
> Existen versións máis modernas das historias tradicionais?

Contamos, escoitamos e dramatizamos!

A lectura do conto foi acompañada dun elemento moi especial: os títeres. Grazas a eles, o alumnado non só escoitou a historia, senón que tamén a viviu, a interpretou e a fixo súa.

A dramatización converteu a biblioteca nun pequeno escenario onde apareceron dragóns, cabaleiros, reis e princesas.

"Viaxamos" a Barcelona e investigamos dragóns… 🐉

O alumnado máis maior foi máis alá e investigou sobre a lenda. Descubriron que os dragóns non só viven nos contos: tamén están presentes na arte e na arquitectura.

Fixeron un pequeno “tour virtual” por Barcelona, a cidade de Gaudí, que resultou ser unha cidade chea de dragóns, especialmente en edificios modernistas. Alí atoparon dragóns en fachadas, esculturas e mesmo en elementos decorativos moi sorprendentes .

Aquí podedes ver o vídeo que inspirou a súa investigación:
https://www.youtube.com/watch?v=bziGFzi8tVY

Despois de investigar e observar, chegou o momento de crear. Cada alumno e alumna deseñou o seu propio dragón, deixando voar a imaxinación: dragóns feroces, simpáticos, coloridos… e mesmo algún moi pouco perigoso!

Unha historia que segue viva

Esta actividade permitiunos comprobar que as historias tradicionais non son algo do pasado, senón que seguen vivas e evolucionan con nós. Podemos lelas, interpretalas… e tamén cuestionalas.

Porque ler tamén é pensar, imaxinar e crear novas versións do mundo.

Feliz Día do Libro!

As Lectoestrelas superan o desafío final!

Este semana, co remate do libro que estabamos lendo no club de lectura, vivimos unha experiencia moi especial: transformamos o espazo nun auténtico escape room inspirado no libro El club de los especiales de Jordi Sierra i Fabra. 

Baixo o reto de salvar as “Lectoestrelas” e a continuación do club, tivemos que superar diferentes desafíos que puxeron a proba a nosa memoria, lóxica, capacidade de observación e, sobre todo, o traballo en equipo, tal e como fixeron os protagonistas da nosa lectura!

Ao longo da actividade, os rapaces e rapazas convertéronse nos verdadeiros protagonistas da historia, colaborando entre eles para descifrar códigos, resolver enigmas e superar os desafíos. 

Foi unha experiencia moi divertida e enriquecedora, na que a lectura saíu das páxinas para converterse nunha aventura vivida en primeira persoa. Sen dúbida, unha forma diferente e emocionante de achegarse aos libros e fomentar o gusto pola lectura.

Club: inventamos novas historias

Nas xuntanzas do club de lectura estamos a afondar nas habilidades e nas características dos protagonistas da nosa lectura dun xeito creativo e colaborativo. 

Estamos a crear a nosa propia banda deseñada, nas que destacamos as capacidades das personaxes dando renda solta a nosa imaxinación.

Enlazamos o 11F das mulleres científicas co 8M das mulleres traballadoras: mulleres que abren camiños

 

Tras iniciarnos no 11 de febreiro nas dificultades que tiveron as mulleres para acceder á universidade e poder dedicarse á arquitectura... continuamos o noso traballo este 8 de marzo desmontando e denunciando os estereotipos de xénero e a desigualdade. 

A biblioteca sempre é un centro de recursos e sorprendeunos este mes de marzo cunha lectura con moita forza: Os pantalóns de Luisa

Unha nena que representa a Luisa Capetillo, unha muller que loitou pola igualdade, desafiando ás normas establecidas ao vestir con pantalóns, viaxar e axudar a outras mulleres a saír do analfabetismo. 

RECOMENDACIÓNS DE NADAL: Para rir, soñar e imaxinar, un libro en galego quero pedir xa!

Para rir, soñar e imaxinar, un libro en galego quero pedir xa!

Aquí deixamos unhas recomendacións de lecturas en galego para engadir na carta de Papá Noel e os Reis Magos...

Máis contos, máis maxia, máis galego

NOVOS ESPAZOS DA BIBLIO - RECUNCHOS DE LECTURA!

 O curso pasado, todos colaboramos nun obradoiro de biblioteca creativa para crear uns recunchos de vimbio.

Este curso démoslle un novo uso, transformando parte dos corredores en RECUNCHOS DE LECTURA. 

Agora, ademais da nosa superbiblio, temos nos corredores un espazo que nos acolle cando lemos.

Así resultaro!

 

13 OUTUBRO - DÍA DAS ESCRITORAS

Algo misterioso aconteceu na nosa escola! Cando iamos celebrar o Día das Escritoras, un mensaxeiro secreto da biblio comunicounos que desapareceran e tiñamos que axudar a resolver ese enigma!

                                                

Todos aceptamos ese resto e seguimos as pistas ata atopar as escritoras secretas! Atopamos ata 9 escritoras de distintos países! E ben sabemos que nos libros están agochadas moitas máis!

Con esta actividade, ademais de coñecelas a ELAS descubrimos novas historias e lecturas que nos invitan a seguir lendo!

Aquí vos deixamos como plasmamos e compartimos as nosas descubertas e como foi o proceso! 

CLUB: AS LECTOESTRELAS XUNTAS DE NOVO!

Queremos contarvos unha gran nova! As estrelas da lectura continúan a súa andaina con novas incorporacións, facendo este club de lectura unha comunidade aínda máis grande!

Con ilusión afrontamos este martes a primeira xuntanza do curso con dúas actividades que nos mergullan niso das comunidades lectoras:

Por que estamos aquí? Porque nos gusta ler! Co xogo das afinidades lectoras compartimos gustos e descubrimos cómplices que poden recomendarnos libros!

A segunda... foi entre burbullas e pombas... a que nos transportan? Falando e xogando descubrimos a nosa primeira lectura: BURBULLAS DE CALMA SERENA de Andrea Maceiras.

Agora toca LER!

ATA O PRÓXIMO ANO, LECTOESTRELAS!

Que momentos nos deron as LECTOESTRELAS! 

As xuntanzas arredor dos libros trouxeron consigo debates, xincanas, manualidades, risas, teatro e incluso unha cápsula do tempo!

Aquí deixamos unha pequena mostra de como clausuramos o club ata o ano que vén! Fixemos unha lectura dramatizada das dúas obras de teatro lidas: WOMBO COMBO e As terapias da Doutura Ledicia e enterramos a nosa cápsula de tempo feita tras a lectura de O enigma de Sempreviva.

As Estrelas da Lectura ben sabemos que os libros dan para moito e unha vez que te mergullas nas súas páxinas pode acontecer de todo!

MES DO LIBRO en FAMILIA

 

Este ano, quixemos celebrar o Mes do Libro en FAMILIA. Durante o mes de abril, e parte de maio, fixemos un especial Lecturas en Familia. Con esta iniciativa, foron pasando polo cole e pola biblio nais, pais e irmás maiores para compartir un ratiño moi especial arredor dos libros. 

As familias do Párroco son estupendas e tivemos moitos voluntarios que se animaron a ler e teatralizar os contos e libros favoritos de cada casa. Dende os máis pequenos ata os maiores do cole gozamos destes encontros. Nunca somos demasiado maiores para que nos lean!

Moitas grazas por vir!

MÁIS CONTOS NO XARDÍN

 Ao longo das pasadas semanas seguimos aproveitando o noso xardín como escenario das lecturas.

Zenda e Jimena de 2º de primaria leron os compañeiros do ciclo Rufo e o ataque dos escarabellos das patacas.

Nerea e Sienna de 4º leron Marcelo Morcego a 1º de primaria

e a súa compañeira Claudia tamén nos contou os bule bule de Onde estás caracol?

As sombras do noso liquidámbar e da nosa cerdeira son estupendas para este recuncho lector. E se vai frío sempre atopamos acubillo nas nosas aulas.