O pasado xoves gozamos dunha tarde moi divertida grazas aos Ratos de Lonxedetodo da compañía Trinketrinke teatro.
Un rato de biblioteca achegouse ata o Centro Cultural Nautilus e narrou dun xeito moi especial 3 fermosos contos de ratos.
Con música, palmas e xogos de palabras, grandes e pequenos fomos participando na sesión.
Sen dúbida foi unha tarde moi divertida na que lemos doutra forma.
Grazas a todos por participar nestas iniciativas de Lectura e Familia!
Ata a próxima!
Como ben sabedes, este ano estivemos indagando sobre os meteoros. Todo ese traballo foi presentado na Exposición Universal do Párroco coa que compartimos todo o aprendido con compañeiros, familiares e amigos.
Os meteoros dan para moito! Ciencias, tecnoloxía, literatura, poesía, arte... Cantas cousas podemos descubrir se somos curiosos.
Foi unha xornada moi especial na que descubrimos o feito por outras clases e, a pesar de levar xa un ano experimentando e aprendendo, onte aínda ampliamos algo máis!
Moitas grazas as familias por vir, participar e amosar tanta curiosidade por todo o que tiñamos que contarvos!
Como actividade final do programa LECTURAS E FAMILIAS, o VENRES 23 DE MAIO ás 18:00, no centro cultural Nautilus de San Andrés de Comesaña, poderemos gozar da obra de teatro "O libro máxico" da compañía Migallas.
A actividade é para estar en familia: os nenos e nenas deberán ir acompañados de pais, nais, avós, avoas... Seguro que todos gozamos desta obra de teatro, maiores e pequenos!
Compartimos a ligazón para anotarse: https://forms.gle/yJdfWAf5gApkMcbt7
Esperámosvos!
Esta tarde, na biblioteca do noso cole, nais, pais e mestras compartiron un ratiño con Carla Muñoz, licenciada en Biblioteconomia e Documentación e especializada en literatura infantil e promoción da lectura.
A sesión de hoxe lembrounos o impacto da lectura, pero, sobre todo, a importancia de crear un vínculo cos libros e coa lectura. É dicir, promover dende ben pequenos o amor polos libros e polas historias, sempre dende o pracer.
Non hai unha única fórmula máxica para criar nenas e nenos lectores, pero seguro que os consellos desta experta nos axudan: espazos adicados á lectura, tempo adicado á lectura compartida, moitas posibilidades diferentes...
Esperamos que esta sesión fora de proveito!
Como xa sabedes, a biblioteca do noso cole participa no programa LECTURA E FAMILIAS. Ademais da realización de actividades en familia, tamén forma do programa a formación de familias para o fomento da lectura dende o fogar. Con este obxectivo, o próximo VENRES 21 DE MARZO de 16:30 ata 18:30, acode á biblioteca do noso centro, Carla Muñoz, licenciada en Biblioteconomia e Documentación e especializada en literatura infantil e promoción da lectura, para impartir un curso vivencial no que se tratará a lectura no fogar na etapa de infantil e primaria.
Compartimos a ligazón para anotarse: https://forms.gle/ZDxVHjLRoUraHCAP9
Julia de 2º de primaria abriu camiño adicando esta fantástica dramatización da receita do caldo á Rosalía de Castro. Agardamos que moitas e moitos máis se animen.
Podedes velo no blog de Fonte dos Frades. AQUÍ
Tedes aquí as fotos dos mandados. E coma sempre dicimos non están todos os que son, pero xa estarán Parabéns a tódolos participantes!!
Tiñamos gañas de vivir a tope esta data festeira no calendario do noso cole. Este curso por fin puidemos retomar a tradición que tiñamos dende tantos e tantos anos. Estas semanas atrás foron unha fervedoira de preparativos e traballos nas aulas dando forma os disfraces que cada grupo deseñou. Preparativos, feitura de disfraces, mandados trouleiros de Leonardo, feitura de coplas e testamento, carautas, antifaces e ensaios do baile quedaron xa atrás. Agora só queda amosarvos como trancorreu o día grande a tódolos que non puidestes acompañarmos.
Para todos grazas polo voso apoio e axuda. Gozade do vídeo e do entroido que enche estes días as rúas.
Xa estamos metidos na cociña para atender a petición de cociña creativa de Nadal! A primeira receita chega dende Aldara de 1º de primaria, riquísimas galletas de follado con chocolate.
Ingredientes:
Lámina de follado
Chocolate
Moldes
Ovo para pintar(opcional)
Xa chegou o mes de decembro e o Nadal está no aire e nas luces da nosa cidade. No cole temos cáseque todo preparado. A actividade nas aulas é frenética. Nas familias tamén comezan os preparativos. Sara de 3 anos é a primeira en enviarnos o seu homiño.
E os nosos corredores xa se están a preparar para dar acubillo á exposición de Nadal e a nosa árbore colaborativa...e seica nos agarda tamén algunha sorpresiña máis.
Neste nadal podemos cociñar en familia! Esta proposta está aberta dende agora ata o final das vacacións. Daquela non fai falta apurarse. Os días de Nadal son un bo intre para xuntarnos na cociña e iniciar ós vosos nenos e nenas nas sobremesas de nadal.
Tamén podedes enviar a proba á merendola de Nadal da vosa aula. Consultade coa vosa profe!.
