Nova invitación! Contacontos en familia!

 

O próximo venres 5 temos unha nova cita lectora no Centro Cultural Nautilus de San Andrés de Comesaña!

Desta vez, dende Donde viven los Cuentos chega un contacontos para gozar en familia.

Agardamos por vós!

Encontro coa autora Eva Mejuto

Tivemos a sorte de recibir a visita da autora Eva Mejuto, nun encontro moi especial arredor da lectura e da creación de historias.

O alumnado de 3º e 4º de Primaria puido compartir impresións sobre o libro Queco e Kika, unha histora chea de aventuras, humor e personaxes entrañables que gozaron moito ao longo da lectura.

Pola súa parte, os nenos e nenas de 5º e 6º comentaron coa autora a obra O día no que choveron catro gatos, unha historia sorprendente e divertida que deu pé a interesantes reflexións e preguntas.

Durante a visita, Eva Mejuto falou do seu traballo como escritora, explicou como nacen as súas historias e respondeu con moita proximidade e cariño ás preguntas do alumnado, que participou con gran interese e entusiasmo.

Foi unha experiencia moi enriquecedora que nos permitiu achegarnos un pouco máis ao mundo dos libros e descubrir todo o que se agocha detrás da creación dunha obra literaria.

Moitas grazas a Eva Mejuto pola súa visita e por compartir connosco a súa paixón pola lectura e pola escrita.

Contos de ratos en familia!

O pasado xoves gozamos dunha tarde moi divertida grazas aos Ratos de Lonxedetodo da compañía Trinketrinke teatro.

Un rato de biblioteca achegouse ata o Centro Cultural Nautilus e narrou dun xeito moi especial 3 fermosos contos de ratos. 

Con música, palmas e xogos de palabras, grandes e pequenos fomos participando na sesión.

Sen dúbida foi unha tarde moi divertida na que lemos doutra forma. 

Grazas a todos por participar nestas iniciativas de Lectura e Familia!

Ata a próxima!

A nosa biblio: clave na campaña solidaria con Senegal

A nosa biblioteca foi durante uns meses o centro neurálxico da operación "Doazón a Senegal".

Grazas ao Club Celta de Vigo, fomos quen de descubrir un proxecto de colaboración con Senegal e unímonos a este proxecto solidario. O cole revisou materiais que estaban almacenados e sen usar, elixindo sempre materiais en bo estado e que puidesen ser útiles no lugar de destino, comezamos a preparar todo para o envío.

Foron meses de traballo para o profesorado e alumnado. Entre todos, fomos enchendo caixas que viaxarían miles de kilómetros ata unha escola de Dakar.

Despois de todo, recibimos a nova de que o alcalde de Dakar estaba na nosa cidade e quería vir en persoa a agradecernos a colaboración e a coñecer a nosa escola. Recibímolo no mes de maio e como non podía ser doutra maneira, démoslle a benvida cantando arredor no noso Maio.

Aquí deixamos un vídeo-resumo de todo o proceso! A semente da solidariedade e xenerosidade medra no Párroco...

 

A biblio invítavos ao teatro en familia!

Queridas familias, 

Como actividade do programa Lectura e Familias, o XOVES 21 de maio ás 18:00 poderemos gozar dun espectáculo teatral no centro cultural Natutilos de San Andrés de Comesaña. 

A actividade é para asistir e gozar en familia: as crianzas deberán ir acompañadas de pais, nais, avós, avoas...

Esperámosvos! 

MAIO: Que lemos?

O mes de maio chega á biblioteca cargado de propostas para descubrir historias, emocións e arte a través dos libros.

15 de maio: Día Internacional das Familias

Con motivo do Día Internacional das Familias, prepararemos un expositor especial con libros relacionados coas familias.

Será unha boa oportunidade para compartir lecturas sobre afectos, diversidade e convivencia, descubrindo historias nas que recoñecerse e descubrir diferentes modelos familiares.

Entre os títulos seleccionados estarán obras como:

18 de maio: Día Internacional dos Museos

Este mes tamén recomendamos especialmente a lectura de El museo para conmemorar o Día Internacional dos Museos. 

Para completar a experiencia, podemos realizar tamén pequenas visitas virtuais a espazos emblemáticos relacionados coa arte e a arquitectura do noso querido Gaudí:

• Casa-museo Gaudí
• Sagrada Familia (visita virtual)
• Palau Güell

Ademais, atopamos un pequeno expositor con outros libros relacionados coa arte, os museos e a creatividade para seguir descubrindo historias… e artistas.

Sant Jordi cobra vida na nosa biblio

Na biblioteca escolar vivimos unha xornada moi especial arredor da lenda de Sant Jordi. 

Despois de coñecer e ler esta fermosa historia tradicional, o alumnado de 4º púxose mans á obra para dar vida aos personaxes creando os seus propios monicreques.

Coas súas creacións prepararon pequenas representacións da lenda, converténdose en auténticos actores e actrices por un día.

O máis divertido foi comprobar como, en ocasións, a historia cambiaba o seu rumbo: algúns grupos decidiron modificar o final da lenda, ofrecendo versións sorprendentes, divertidas e moi orixinais. Houbo dragóns amigables, princesas valentes e finais cheos de humor e amizade.

Compartimos aquí os vídeos das representacións para que poidades gozar do gran traballo realizado polo alumnado.

Parabéns a todos e todas pola vosa creatividade, ilusión e excelente traballo en equipo!

Vídeo grupo 1

Vídeo grupo 2

Vídeo grupo 3

Vídeo grupo 4

Maleta da Saúde cunha lectura en Infantil

O alumnado de infantil está a vivir unha experiencia chea de descubrimentos arredor da saúde grazas a unha auténtica maleta de proxecto.

Cada vez que abrimos a maleta aparecen novos elementos que nos fan aprender e reflexionar sobre o coidado do noso corpo, os hábitos saudables e a importancia de sentirnos ben. A curiosidade está moi presente en cada sesión, e as ganas de participar non deixan de medrar.

E como non podía ser doutra forma… dentro da maleta tamén hai un libro! Trátase de “El botiquín de la doctora Nora”, un conto co que gozamos moitísimo. A través desta historia, acompañados polo profe Martín, fomos coñecendo mellor como coidarnos e que podemos facer cando non nos atopamos ben.

Entre contos, xogos e pequenas investigacións, estamos aprendendo un montón. Sen dúbida, esta maleta está chea de maxia… e de moi bos hábitos! 

Teatro no noso club de lectura!

No noso club de lectura estamos a vivir unha experiencia moi especial: achegámonos ao xénero teatral!

A diferenza doutros libros que lemos anteriormente, o teatro invítanos a mergullarnos nas historias dunha maneira máis activa e participativa. Un dos aspectos que máis estamos a gozar é a posibilidade de facer lecturas dramatizadas. Ao repartir os personaxes e ler en voz alta, convertémonos por un intre en actores e actrices, dando vida aos diálogos e ás emocións da obra. Isto axúdanos non só a comprender mellor o texto, senón tamén a sentir con máis intensidade o que lles acontece aos personaxes.

As risas, os momentos máis intensos e mesmo os pequenos erros forman parte dunha aprendizaxe compartida que nos une como grupo.

En definitiva, ler teatro no club de lectura está a ser unha experiencia moi enriquecedora e divertida, que nos permite descubrir a literatura desde outra perspectiva moito máis viva e creativa.

Celebramos o Día do Libro coa lenda de Sant Jordi

Este ano, con motivo do Día do Libro, na nosa biblioteca mergullámonos nunha das historias máis coñecidas da tradición europea: a lenda de Sant Jordi.

Para achegarnos a ela dun xeito especial, escollemos o álbum “¡Qué historia tan bestia, minimoni!” de Rocío Bonilla. Un conto que recupera esta historia clásica pero engadindo unha mirada actual e crítica. A través das súas páxinas, non só coñecemos a historia do cabaleiro, o dragón e a princesa, senón que tamén reflexionamos sobre cuestións moi interesantes:
> As princesas necesitan ser salvadas?
> Por que cambian os contos co paso do tempo?
> Existen versións máis modernas das historias tradicionais?

Contamos, escoitamos e dramatizamos!

A lectura do conto foi acompañada dun elemento moi especial: os títeres. Grazas a eles, o alumnado non só escoitou a historia, senón que tamén a viviu, a interpretou e a fixo súa.

A dramatización converteu a biblioteca nun pequeno escenario onde apareceron dragóns, cabaleiros, reis e princesas.

"Viaxamos" a Barcelona e investigamos dragóns… 🐉

O alumnado máis maior foi máis alá e investigou sobre a lenda. Descubriron que os dragóns non só viven nos contos: tamén están presentes na arte e na arquitectura.

Fixeron un pequeno “tour virtual” por Barcelona, a cidade de Gaudí, que resultou ser unha cidade chea de dragóns, especialmente en edificios modernistas. Alí atoparon dragóns en fachadas, esculturas e mesmo en elementos decorativos moi sorprendentes .

Aquí podedes ver o vídeo que inspirou a súa investigación:
https://www.youtube.com/watch?v=bziGFzi8tVY

Despois de investigar e observar, chegou o momento de crear. Cada alumno e alumna deseñou o seu propio dragón, deixando voar a imaxinación: dragóns feroces, simpáticos, coloridos… e mesmo algún moi pouco perigoso!

Unha historia que segue viva

Esta actividade permitiunos comprobar que as historias tradicionais non son algo do pasado, senón que seguen vivas e evolucionan con nós. Podemos lelas, interpretalas… e tamén cuestionalas.

Porque ler tamén é pensar, imaxinar e crear novas versións do mundo.

Feliz Día do Libro!