RECOMENDACIÓNS LECTORAS!

 

E... as vacacións de verán xa están aquí!

Lembrade que un libro sempre é boa compañía, tamén na praia e na piscina!

EXPOSICIÓN UNIVERSAL DO PÁRROCO - OS METEOROS

Como ben sabedes, este ano estivemos indagando sobre os meteoros. Todo ese traballo foi presentado na Exposición Universal do Párroco coa que compartimos todo o aprendido con compañeiros, familiares e amigos.

Os meteoros dan para moito! Ciencias, tecnoloxía, literatura, poesía, arte... Cantas cousas podemos descubrir se somos curiosos.

Foi unha xornada moi especial na que descubrimos o feito por outras clases e, a pesar de levar xa un ano experimentando e aprendendo, onte aínda ampliamos algo máis!

Moitas grazas as familias por vir, participar e amosar tanta curiosidade por todo o que tiñamos que contarvos!

ATA O PRÓXIMO ANO, LECTOESTRELAS!

Que momentos nos deron as LECTOESTRELAS! 

As xuntanzas arredor dos libros trouxeron consigo debates, xincanas, manualidades, risas, teatro e incluso unha cápsula do tempo!

Aquí deixamos unha pequena mostra de como clausuramos o club ata o ano que vén! Fixemos unha lectura dramatizada das dúas obras de teatro lidas: WOMBO COMBO e As terapias da Doutura Ledicia e enterramos a nosa cápsula de tempo feita tras a lectura de O enigma de Sempreviva.

As Estrelas da Lectura ben sabemos que os libros dan para moito e unha vez que te mergullas nas súas páxinas pode acontecer de todo!

Infantil na nosa biblio creativa!

 

Inspirados no conto "El pez arcoíris", os nenos e nenas de infantil participaron nun obradoiro creativo de collage, creando un peixe de cores moi orixinal!

Tras facer os trazos, rachar os papeis e realizar o collage, cunha simple cartolina negra fixemos relucir as cores deste peixe tan especial.

Aquí deixamos unha mostra do obradoiro! 

Está claro que a nosa biblioteca e os libros dan ás á creatividade!

Visita do escritor a 1º e 2º de primaria

Ademáis de aproveitar a calor e facer lecturas ao aire libre, o alumnado de 1º e 2º recibiu a visita do escritor Ramón Romero Nogueira, autor do libro "A abelliña que perdeu as ás" que foi o elixido para ler en 1º de primaria. Demostrounos que os versos non só están para ler, senón que podemos entoar e disfrutar así dun conto cantado, como foi o caso.  

 

APADRIÑAMENTO LECTOR

O pasado venres aproveitamos o bo tempo e o noso patio-bosque para ler. Todo o cole, en parellas e grupos lectores, compartimos un momento de lectura moi enriquecedor.

Todos con candanseu padriño, madriña, afillado ou afillada, descubriron historias agochadas nas páxinas dos contos. 

Quedamos con ganas de máis e esperamos repetir pronto!

Historias en familia... O libro máxico!

 

Sabemos que mergullarse nun bo libro é fascinante, pero... se resulta que ese libro é máxico e entras a formar parte da historia? Iso é o que aconteceu hoxe no Centro Nautilus de San Andrés de Comesaña. 

Nais e pais, tías e tíos, avós e avoas, primos e primas, amigos e amigas, veciños e veciñas, mestras, alumnos e alumnas... todos xuntos gozamos e rimos mentres xogabamos ao teatro coa obra "O libro máxico" de Migallas teatro.

Grazas a todas as familias por achegarvos e participar! E lembrade... isto de compartir lecturas, non remata nunca!

Ata a próxima!

Legos na biblio!

Este ano, co programa Bibliteca Creativa, démoslle unha pequena volta á nosa biblio e... sen dúbida, o recuncho dos legos resultou triunfar entre o noso alumnado.

Aquí temos as creacións de 3 alumnos de 4ºEP durante un patio na biblio.

Formación clubs lectura e encontro coa autora

Esta semana, a nosa coordinadora acudiu ás xornadas de Club de Lectura en Santiago e tivo un encontro coa autora PAULA CARBALLEIRA, escritora de WOMBO COMBO, un dos libros lidos polo Club Estrelas da Lectura.

E coa seguinte imaxe compartimos a gran importancia dos clubs de lectura e o que intentamos conseguir co noso! Sen esquecer ler por gusto!

Club de lectura - teatralizamos

 Ás estrelas da lectura non hai xa libro que se lles resista. Agora mesmo están mergullados en dúas obras de teatro. 

Aquí podedes ver como se organizaban na última xuntanza: repartiron as personaxes para facer unha lectura dramatizada, pensaron nos elementos de decoración, no vestiario... E todo iso nun fabuloso recuncho do Párroco.

LETRAS GALEGAS CREATIVAS

 

Este ano, polo día das Letras Galegas, ademais de reflexionar sobre a importancia e riqueza que supón falar galego, facemos unha viaxe pola tradición da poesía oral e das cantareiras.

Para esta viaxe pola cultura das cantareiras e pandereteiras, facemos uso dos pósters informativos que nos contan a historia de Eva Catiñeira, Adolfina e Rosa Casás e das Pandereiteiras de Mens, as grandes homenaxeadas este ano. 

Fomos máis alá e indagamos na tradición da música galega, traendo os instrumentos como as pandeiretas, o pandeiro, as cunchas de vieira e a lata de pimentón para poder compartir cos demais os pequenos tesouros que temos nalgunha das nosas casas como testigos desa tradición tan bonita que temos.

Dende biblioteca creativa e arts, deseñamos e creamos as nosas propias pandeiretas.

E todo este traballo arredor da nosa cultura e da nosa lingua rematou coa actuación do grupo de pandereteiras do noso barrio.

MES DO LIBRO en FAMILIA

 

Este ano, quixemos celebrar o Mes do Libro en FAMILIA. Durante o mes de abril, e parte de maio, fixemos un especial Lecturas en Familia. Con esta iniciativa, foron pasando polo cole e pola biblio nais, pais e irmás maiores para compartir un ratiño moi especial arredor dos libros. 

As familias do Párroco son estupendas e tivemos moitos voluntarios que se animaron a ler e teatralizar os contos e libros favoritos de cada casa. Dende os máis pequenos ata os maiores do cole gozamos destes encontros. Nunca somos demasiado maiores para que nos lean!

Moitas grazas por vir!

As Lectoestrelas seguen pechando libros...

 

Outro libro lido no Club de Lectura "As estrelas da lectura". 

Este libro foi toda unha aventura, dende atopar unha lata de galletas que agochaba historias ata crear a nosa propia cápsula do tempo.

Aqui van algunhas fotos que recolles algúns momentos das nosas xuntanzas arredor do libro "O enigma de Siempreviva".

               

IMOS AO TEATRO EN FAMILIA!

 

Como actividade final do programa LECTURAS E FAMILIAS, o VENRES 23 DE MAIO ás 18:00, no centro cultural Nautilus de San Andrés de Comesaña, poderemos gozar da obra de teatro "O libro máxico" da compañía Migallas.

A actividade é para estar en familia: os nenos e nenas deberán ir acompañados de pais, nais, avós, avoas... Seguro que todos gozamos desta obra de teatro, maiores e pequenos!

Compartimos a ligazón para anotarse: https://forms.gle/yJdfWAf5gApkMcbt7

Esperámosvos!

CURRUNCHOS DE VIMBIO

 

CURRUNCHOS DE VIMBIO PARA LER

A nosa biblio conta agora con dous magníficos recunchos de vimbio para ler e gozar nun espazo único. O mellor de todo é que foron feitos coas nosas propias mans.

Todo o cole, dende os máis pequenos ata os maiores do último curso, construíu de forma colaborativa dous currunchos ben especiais.

              

Esta práctica, ademais de ser un obradoiro no que todos puxemos esforzo e dedicación, permitiunos coñecer o vimbio e o tradicional oficio dos cesteiros e cesteiras.

Foi moi chulo descubrir como podiamos construír estes recunchos coa técnica que empregan os paxaros para facer os seus niños.

Formación de familias sobre LECTURA

Esta tarde, na biblioteca do noso cole, nais, pais e mestras compartiron un ratiño con Carla Muñoz, licenciada en Biblioteconomia e Documentación e especializada en literatura infantil e promoción da lectura.

A sesión de hoxe lembrounos o impacto da lectura, pero, sobre todo, a importancia de crear un vínculo cos libros e coa lectura. É dicir, promover dende ben pequenos o amor polos libros e polas historias, sempre dende o pracer. 

Non hai unha única fórmula máxica para criar nenas e nenos lectores, pero seguro que os consellos desta experta nos axudan: espazos adicados á lectura, tempo adicado á lectura compartida, moitas posibilidades diferentes...

Esperamos que esta sesión fora de proveito!

FORMACIÓN PARA FAMILIAS: LECTURA NO FOGAR

Como xa sabedes, a biblioteca do noso cole participa no programa LECTURA E FAMILIAS. Ademais da realización de actividades en familia, tamén forma do programa a formación de familias para o fomento da lectura dende o fogar. Con este obxectivo, o próximo VENRES 21 DE MARZO de 16:30 ata 18:30, acode á biblioteca do noso centro, Carla Muñoz, licenciada en Biblioteconomia e Documentación e especializada en literatura infantil e promoción da lectura, para impartir un curso vivencial no que se tratará a lectura no fogar na etapa de infantil e primaria.

A actividade é exclusiva para adultos. Os peques, nesta ocasión, deberán quedar na casa. Se hai algunha familia que acoda a formación e teña ao fill@(s) en actividades extraescolares ese día, poderá solicitar a garda e coidado ata o remate da formación con previo aviso a través do formulario de inscrición. Unha mestra fará garda ata o remate do curso.

Compartimos a ligazón para anotarse: https://forms.gle/ZDxVHjLRoUraHCAP9 

PATIOS CREATIVOS NA NOSA BIBLIO CREATIVA!

Coa entrada no programa de Bibliotecas Creativas, novos recunchos e recursos aparecen na nosa biblioteca.

O patio é un momento de descanso, goce e... creatividade! Así estabamos o outro día na biblio:

ESCOITAMOS A CHARO PITA EN FAMILIA!

A tarde de onte no Centro Cultural de San Andrés foi moi especial. Xuntas, escola e familia, gozamos da narración oral de Charo Pita. Sen dúbida, este forma parte dos momentos especiais que queremos que viva toda a nosa Comunidade Educativa.

Adiviñas, contos cantados, historias de medo... hai moitísimos recursos nos libros e na nosa imaxinación! Agora tócanos seguir "xogando cos libros" na casa.

Grazas a todas as familias por estar! Vémonos na próxima!

CONTACONTOS CON CHARO PITA - 7 MARZO ÁS 18:00

Boas! 

Como ben sabedes, este ano estamos no programa LECTURAS E FAMILIAS e queremos convidar ás familias e compartir con nós momentos lectores.

A próxima semana, VENRES 7 DE MARZO, no centro cultural Nautilus de Santo André de Comesaña, temos a oportunidade de vivir unha tarde de lectura e contos con Charo Pita (escritora e narradora cunha gran traxectoria). Será ás 18:00. 

Compartimos a ligazón para anotarse: https://forms.gle/JMU7bftJaR6pUywW8 

Esperámosvos!

23 FEBREIRO - DÍA DE ROSALÍA DE CASTRO

No Párroco facemos unha gran homenaxe á escritora Rosalía de Castro, por ser unha gran defensora da lingua e da cultura galega.

Este ano, ademais da coñecer a súa vida e obra, lemos e ilustramos algúns dos poemas de Cantares gallegos e Follas novas. Escollemos aqueles nos que aparecían os meteoros ou fenómenos atmosféricos por estar relacionados co noso traballo do PDI.

Aquí podedes ver a 3ºEP contando a vida da poeta en forma de poemas:

E aquí a parte da ilustración de versos, estrofas e poemas:

Podedes escoitar os poemas na aula virtual:

 https://www.edu.xunta.gal/centros/ceipparrocodoncamilo/aulavirtual/course/view.php?id=376

13 FEBREIRO - DÍA DA RADIO

Grandes e pequenos, todos gozamos de gravar na nosa RADIO!

Por aquí deixamos algúns momentos no noso estudo de gravación. Que estaremos argallando? Moi pronto estará dispoñible en Radio Camilo!