AGORA SON OS DE 4 ANOS QUEN NOS EXPLICAN AS NORMAS

    Sómosvos afortunados! Se non comprenderades de todo as normas cos anteriores vídeos, agora veñen os da aula de 4 anos lembrarnos as cousas importantes. Graciñas! Que ben o estades a facer en tódolos cursos!

PROBLEMAS COS VÍDEOS

    Estamos a ter algúns problemas cos vídeos. Mentres buscamos unha solución, tede paciencia e non esquezades pasarvos outro día polo blog para mirardes tódalas cousiñas. Polo de agora, deixamos aquí este acceso ao vídeo de 3º. Pouquiño a pouco farémolo cos demais. Graciñas!

COIDANDO DOS MOUCHIÑOS. NORMAS BÁSICAS

    Os nenos e nenas de 5 anos vanvos explicar en dous vídeos todo o que tedes que facer. No primeiro, fálannos das condicións que temos que cumprir para ir á biblioteca. No segundo, aclárannos como facermos alí dentro cos libros.

RAP DAS NORMAS

    Para celebrar o Día das Bibliotecas, o pasado 24 de outubro, propuxémoslles a tódalas aulas a confección de lemas, carteis ou vídeos que relacionasen a lectura coa situación Covid e que nos explicasen ben as normas que temos que seguir cando vaiamos á biblio. Xa temos varios traballiños para publicar. 

    Comezamos co primeiro...: O RAP DAS NORMAS. Protagonistas, os nenos e nenas de 4º de primaria.

    Velaquí volo deixamos! Parabéns, rapaces!

DÍA DAS BIBLIOTECAS

 

Celebramos este día coa posta en marcha da biblioteca. Aínda que a biblio pareza durmida polas circunstancias da Covid, a vida lectora xa é un latexo en tódolos espazos do cole.

-O protocolo xa está concluído e os cursos xa están a traballar na súa presentación. 

-Os mouchiños xa lanzaron as primeiras iniciativas relacionadas co Samaín e o Monstro Coronavirus. 

-As mochilas de lectura e maila maleta viaxeira están xa facendo o seu percorrido dedicadas ao Día das Escritoras, a creatividade e o medo.

-A hora de ler funciona dende o primeiro día de curso.

-O préstamo está en marcha en moitas aulas ou a piques de comezar nas outras.

-O libro do mes, Os medos do rato pequeno, está á espera de lectores. Xeografías Lectoras fai unha parada este mes nas xeografías emocionais (e o medo é unha das emocións máis fondas... e unha moi acaída nesta época do ano!). Imos navegar nos medos para poder ir alén deles sen que nos deixen paralizados, senón dispostos a seguir avanzando (sempre con prudencia) malia os riscos.

-A celebración do centenario de Gianni Rodari toma a súa primeira forma: a do Binomio Fantástico.

- O noso PDI anual Dándolle unha volta ao planeta II: As cores de Asia. Ananos e xigantes, que se centra este ano na saúde e no mundo asiático a través dos ollos de "ananos e xigantes" (o anano coronavirus o primeiro) comezou tamén a súa andaina. 

- As familias xa teñen a primeira invitación a participar canda nós na vindeira celebración do Samaín.

Coidamos que son moitas invitacións a ler este e tódolos días do ano.