MURO DIXITAL PARA A SOLTA DE POEMAS NA SEMANA DA POESÍA.

 Do 22 de Marzo ao 26 celebramos no cole a Semana da Poesía. Como a pandemia non nos permite facer este curso a tradicional "solta" de poemas por tódolos recunchos do cole,  creamos este muro dixital para que todos... familias, profes, alumnos e claro está as aulas no seu traballo diario ,poidades compartir con todos un poema inventado ou copiado, en galego, castelán e mesmo noutra lingua. Podedes envialo en texto, imaxe, audio ou vídeo. 

Se atopades algún problema podedes envialos ó noso correo parrococamilo@gmail.com e nós volo publicaremos.

Todo o que iremos facendo nas aulas publicarase tamén aquí. Xa podedes gozar das primeiras aportacións!.

Feliz semana da poesía!

SEMANA DA PRENSA

 Esta semana e coincindindo coa celebración do Día da Muller desenvolveuse a Semana da prensa. Unha semana diferente por mor da pandemia porque os nosos corredores non puideron estar ateigados de xornais diferentes onde atopar e analizar información interesante. Aínda así os xornais estiveron, e van  estar ata a fin do trimestre, presentes nas aulas na súa modalidade dixital. A prensa é un vehículo de información importante que non debemos descoidar. Recoller e analizar información de diferentes medios e de diversas fontes é unha boa arma contra a desinformación e no presente intre contra a infodemia que arrodea a pandemia da covid-19.

Os nenos de 1º coñeceron a través dela a unha importante muller nas pescudas científicas que sostiveron o desenvolvemento das vacinas. Eles, que na súa parte do PDI tamén estudaron as vacinas, tiveron así outro punto de vista interesante do tema.

PESCUDANDO NAS MULLERES E A CIENCIA: 4 e 5 anos

 Para visibilizar o traballo arredor do tema imos comezar falando da particular ollada dos pequenos das clases de infantil.

 Os nenos de 4 pescudando no mundo dos "laboratorios"  achegaronse á Marie Curie. Coñecérona lendo o conto  que forma parte da nosa maleta viaxeira de mulleres

Despois de falar moito dela e xuntar tódolos datos precisos fixeron estes traballiños sobre ela.

 Os de 5 pescudaron nas cousas que lles podían aportar dúas científicas importantes á súa loita contra os mocos e o coronavirus dentro do seu proxecto pirata. Tratábase da astrónoma Hipatia de Alejandría e a viróloga Margarita Salas. Un luxo de axudantes na súa misión!

Investigaron como eran os seus traballos de astrónoma e viróloga e que precisaban para facelo ben. A palabra astrónoma éralles descoñecida e moito máis viróloga. Despois de reflexionar, enseguidiña relacionaron os astrónomos coas estrelas e lembraron que nos barcos é moi importante coñecer o ceo para  poder orientarse. Só faltaba averiguar que instrumentos usaba un astrónomo nos tempos de Hipatia... Unha olladiña a internet e listo... O astrolabio! 

Para averiguar cousiñas sobre Margarita Salas tíñano  máis dicifil. 

-Que será unha viróloga?. Nin idea! O único que tiñan claro era que debía estudar algo porque a súa profesión remataba en ...ÓLOGA. En troques de pescudar nos libros ou en internet decidiron poñerse en contacto con ela e preguntarlle directamente cal era o seu traballo e como podía axudar no barco.

A presentación dos debuxos completa porémola en "Follas de Moreira"

Pescudando nos xornais van seguir investigando no uso do microscopio e no labor doutra Margarita importante. Margarita del Val. Xa vos amosarán as fichas que farán coa información. 

MULLERES IMPORTANTES

 2º de Primaria decidiu matinar sobre as mulleres importantes na nosa vida. Son as que non saen nos libros nin nos xornais, pero están aí levándonos da man no noso medre como persoas. Isto foi o que eles debuxaron.

8 DE MARZO. DÍA DA MULLER

 Neste día tan especial andamos todos as voltas co noso "caderno de científicas" co que queremos facer unha escolma dalgunhas das mulleres destacadas na historia da ciencia, en xeral, e da mediciña e bioloxía en particular. Son mulleres de onte e de hoxe. Mulleres que puxeron os alicerces e mulleres que hoxe seguen o seu ronsel.

Esta é tamén a nosa homenaxe a todas aquelas mulleres que apoiaron e apoian os coidados e a investigación nesta pandemia. Todas elas forman parte de equipos de colaboración de homes e mulleres nos que quixeron - e queremos- ser partícipes, ao mesmo nivel e dando o protagonismo "ós e as" que o teñen; sen esquecer a ninguén polo seu xénero. Aínda que hoxe traiamos aquí só ás mulleres...

Nós estamos a facer o noso traballo nas aulas. Vós se queredes podedes tamén entretervos e informarvos coñecendo estas mulleres especiais. Son só unha pequena parte das moitas que traballan nos laboratorios e das moitas heroínas anónimas dos hospitais e os ambulatorios.

A tódalas que hoxendía pescudan e actúan contra o coronavirus todo o noso agradecemento

CIENCIA E MULLERES

MARGARITA SALAS                                                      VIRÓLOGA

MARÍA BLASCO                                                              VIRÓLOGA

ÁFRICA GONZÁLEZ                                                       INMUNÓLOGA

ALICIA ESTEVEZ TORANZO (GAL)                            MICROBIÓLOGA

MARISOL SOENGAS GONZALEZ (GAL)                    MICROBIÓLOGA

VANESA VALDEIGLESIAS GARCÍA (gal)                    BIÓLOGA

ISABEL ZENDAL (GAL)                                                  ENFERMEIRA      

MARGARITA DEL VAL                                                  VIRÓLOGA

LORENA SÁNCHEZ-FELIPE                                          INVESTIGADORA    VACINAS

ISABEL SOLA                                                                   INVESTIGADORA    VACINAS

ANA FERNÁNDEZ SESMA                                            VIRÓLOGA

NURIA OLIVER                                                                ENXEÑÉIRA DE DATOS

NEREA IRIGOYEN                                                          VIRÓLOGA

PILAR MARCO                                                                 FARMÁCÓLOGA NANOTECNÓLOGA

MARÍA RODRÍGUEZ                                                       BIÓLOGA COMPUTACIONAL

CAROLINA VIDAL                                                           MÉDICA

MONTSERRAT BÁRCENA                                              INVESTIGADORA COVID

ROSA MENÉNDEZ                                                         PRESIDENTA CSIC                                           

SARA BERTRÁN DE LIS                                                  INVESTIGADORA COVID

ROCÍO SILLERAS                                                              INVESTIGADORA COVID

Nas seguintes entradas iremos dándovos conta das nosas pescudas e traballos.

MÁIS TRABALLOS DE ROSALÍA

 É a quenda dos nenos de 3 anos. Eles achegáronse á figura de Rosalía e pintaron o seu retrato.

Tamén os de 3º de primaria amósannos máis de preto as flores poéticas que fixeron.

2º de primaria ideou novas portadas para o libro de Rosalía "Cantares Galegos"