20N - CONMEMORACIÓN DOS DEREITOS DA INFANCIA: XOGOS E LAB BOOKS NA BIBLIO

 

Hoxe, 20 de novembro, é o día no que conmemoramos os dereitos dos nenos e das nenas. 

Na biblioteca atopamos un xogo para descubrir ou lembrar os nosos dereitos. Gozamos moito do xogo, e tamén aproveitamos para reflexionar sobre o cumprimento dos dereitos,  a importancia de defender a infancia e as diferentes situacións que poden darse segundo o lugar no que nos atopemos. 

Completamos esta actividade coa creacións duns lab books coa información que atopamos nunha pequena investigación sobre a orixe dos dereitos do ser humano e, especificamente, dos nenos e nenas.

Como sempre dicimos, aínda que somos pequenos e pequenas, temos os nosos dereitos e unha voz para compartir grandes ideas cos adultos!

 

PRIMEIRA XUNTANZA DAS "ESTRELAS DA LECTURA"!

 

Por fin chegou o día no que iniciamos o noso club de lectura!

Hoxe foi a primeira reunión e tiñamos que comezar a crear esta nova comunidade que nace no noso centro... 

O primeiro que fixemos foi decidir un nome! Varias boas ideas apareceron no debate, pero finalmente quedamos con "As estrelas da lectura" ou súa versión abreviada "lectoestrelas".

Como bos lectores que somos, precisabamos unha bolsa á altura para transportar os nosos libros... polo que hoxe o club de lectura transformouse nun obradoiro artístico e creativo! Aínda estamos no proceso, pero xa vos deixamos botar unha ollada!

OBRADOIRO DE KUMIHIMO

Como ben sabedes, encántanos que o noso alumnado teña a oportunidade de participar en obradoiros artísticos e creativos. 

Este ano iniciamos un obradoiro enmarcado dentro de Polos e Biblioteca creativa para aprender a técnica de  KUMIHIMO!

Resulta que o Kumihimo, é un disco ou telar redondo que nos serve para crear trenzas redondas e facernos unhas bonitas pulseiras!

Aquí vos deixamos unha mostra do proceso!

SAMAÍN NA BIBLIO

 SAMAÍN NA BIBLIO    

A biblio do noso cole non puido librarse dos efectos do samaín… Nestas últimas semanas, uns pequenos seres foron conquistando as nosas estanterías coas súas teas… Foi difícil non quedar presos nas súas redes… 

As pantasmas do Párroco tamén pasaron pola biblio para amosarnos as lecturas máis terroríficas  

Entrar na biblio sempre é unha aventura… pero esta foi arrepiante  

Os nenos e nenas do cole gozaron e compartiron lecturas terroríficas con monstros e meigas como protagonitas... E  tamén se achegaron á historia do Samaín e coñeceron a orixe desta celebración en Galicia.

24 DE OUTUBRO - DÍA DAS BIBLIOTECAS

Hoxe, 24 de outubro, celebramos o día das bibliotecas cunha BIBLIOXINCANA organizada polos mouchiños da nosa biblio.

Estes pequenos seres que habitan na nosa biblioteca escolar prepararon unha formación de usuarios a través de diferentes probas: atopar libros, devolver libros, xogo de memoria coas normas en pictogramas, uso dos marcadores, coñecer os expositores... En resumo... unhas desfiantes probas que o alumnado do Párroco foi superando con éxito grazas ao seu bo coñecemento da biblio!

Aínda que non queremos desvelar o contrasinal secreto... compartimos convosco algunhas fotos da xincana!

BIBLIOXINCANA DE INFANTIL:

BIBLIOXINCANA DE PRIMARIA:

CELEBRAMOS O DÍA DAS ESCRITORAS!

O pasado 14 de setembro celebramos o DÍA DAS ESCRITORAS polo que leváronse a cabo diferentes actividades para conmemorar e reivindicar o labor e legado das escritoras.

Tanto infantil como primaria puido gozar dun contacontos (organizado por alumnas de 6º de primaria) no que relataban a historia de vida da escritora española GLORIA FUENTES.

O alumnado de infantil, aproveitando esta figura, estivo lendo cousas desta escritora e elaborou uns pósters para compartir o traballado co resto da comunidade.

Os cursos de primaria aproveitaron para compartir nos pósters lecturas das súas escritoras favoritas e para divulgar escritoras galegas contemporáneas.

Nos esquecimos detalle e fixemos un obradoiro de marcapáxinas seguindo a temática "escritoras".

No seguinte vídeo podedes ver un poquiño do proceso - resultado das 3 actividades da semana!

DÍA DAS ESCRITORAS! Obradoiro de marcapáxinas e contacontos nos patios!

Mañá, luns 14 de outubro, é o día no que conmemoramos ás ESCRITORAS pola súa labor e o legado que nos deixan ao longo da historia.

Ao longo da semana haberá actividades e obradoiros nos que nos acordaremos de marabillosas escritoras, poetas e pensadoras.

No especial de patios, teremos un OBRADOIRO DE MARCAPÁXINAS.

Haberá un recuncho preparado para o deseño dun marcapáxinas de escritoras. Podes vir nos patios e facer o teu!

Tamén un CONTACONTOS da biografía dunha ESCRITORA. Vén e descobre de quen se trata!

OBRADOIRO DE FÍOS!

Iniciamos os PATIOS CREATIVOS dende a BIBLIO coa posta en marcha do OBRADOIRO DE FÍOS!

O tempo de lecer do luns (11:45-12:15) podes adicalo a facer pulseiras dunha maneira moi orixinal!

Podedes apuntarvos ao obradoiro a través da CAIXA DE CORREO da biblio! 

INICIAMOS CLUB DE LECTURA!

Neste curso, dende a Biblioteca do CEIP Párroco Don Camilo queremos crear unha comunidade ao redor dos libros coa posta en marcha dun CLUB DE LECTURA!

Un club de lectura consiste nunha práctica de socialización e creación de comunidades ao redor dos libros. Para poder iniciar esta práctica, unha mestra guiará e mediará cada xornada do club de lectura a través da organización de debates, lecturas dramatizadas, merendas e outras actividades relacionadas coa lectura común do grupo.

Neste curso 2024-2025 queremos comezar por formar un club cos máis maiores! Os alumnos e as alumnas de 5º e 6º.

O club de lectura contará cun calendario de xuntanzas, unha sesión cada 15 días (semanas alternas), os martes pola tarde.

Apúntate!

LEMBRAMOS AS NORMAS!

 A biblioteca é un espazo no que podemos realizar múltiples actividades como: 

• Ler ou estudar 
• Buscar información 
• Coller libros en préstamo 
• Empregar os xogos dispoñibles 
• Realizar actividades de debuxo e escritura 
• Participar en actividades organizadas pola biblio: contacontos, obradoiros… 
• Empregar os ordenadores para tarefas de investigación, búsqueda de información, traballos… 

O ambiente da biblioteca, como lugar de lectura, investigación ou estudo, debe ser o adecuado. O silencio, a responsabilidade e o respecto polos demais e polo espazo crean o clima necesario e imprescindible para un bo funcionamento da mesma. 

Deixamos por aquí as normas para que a nosa biblioteca funcione correctamente e sexa un espazo cómodo no que podamos gozar dos libros e da comunidade que construímos ao redor deles!