CURRUNCHOS DE VIMBIO

 

CURRUNCHOS DE VIMBIO PARA LER

A nosa biblio conta agora con dous magníficos recunchos de vimbio para ler e gozar nun espazo único. O mellor de todo é que foron feitos coas nosas propias mans.

Todo o cole, dende os máis pequenos ata os maiores do último curso, construíu de forma colaborativa dous currunchos ben especiais.

              

Esta práctica, ademais de ser un obradoiro no que todos puxemos esforzo e dedicación, permitiunos coñecer o vimbio e o tradicional oficio dos cesteiros e cesteiras.

Foi moi chulo descubrir como podiamos construír estes recunchos coa técnica que empregan os paxaros para facer os seus niños.

Esta tarde, na biblioteca do noso cole, nais, pais e mestras compartiron un ratiño con Carla Muñoz, licenciada en Biblioteconomia e Documentación e especializada en literatura infantil e promoción da lectura.

A sesión de hoxe lembrounos o impacto da lectura, pero, sobre todo, a importancia de crear un vínculo cos libros e coa lectura. É dicir, promover dende ben pequenos o amor polos libros e polas historias, sempre dende o pracer. 

Non hai unha única fórmula máxica para criar nenas e nenos lectores, pero seguro que os consellos desta experta nos axudan: espazos adicados á lectura, tempo adicado á lectura compartida, moitas posibilidades diferentes...

Esperamos que esta sesión fora de proveito!

FORMACIÓN PARA FAMILIAS: LECTURA NO FOGAR

Como xa sabedes, a biblioteca do noso cole participa no programa LECTURA E FAMILIAS. Ademais da realización de actividades en familia, tamén forma do programa a formación de familias para o fomento da lectura dende o fogar. Con este obxectivo, o próximo VENRES 21 DE MARZO de 16:30 ata 18:30, acode á biblioteca do noso centro, Carla Muñoz, licenciada en Biblioteconomia e Documentación e especializada en literatura infantil e promoción da lectura, para impartir un curso vivencial no que se tratará a lectura no fogar na etapa de infantil e primaria.

A actividade é exclusiva para adultos. Os peques, nesta ocasión, deberán quedar na casa. Se hai algunha familia que acoda a formación e teña ao fill@(s) en actividades extraescolares ese día, poderá solicitar a garda e coidado ata o remate da formación con previo aviso a través do formulario de inscrición. Unha mestra fará garda ata o remate do curso.

Compartimos a ligazón para anotarse: https://forms.gle/ZDxVHjLRoUraHCAP9 

PATIOS CREATIVOS NA NOSA BIBLIO CREATIVA!

Coa entrada no programa de Bibliotecas Creativas, novos recunchos e recursos aparecen na nosa biblioteca.

O patio é un momento de descanso, goce e... creatividade! Así estabamos o outro día na biblio:

ESCOITAMOS A CHARO PITA EN FAMILIA!

A tarde de onte no Centro Cultural de San Andrés foi moi especial. Xuntas, escola e familia, gozamos da narración oral de Charo Pita. Sen dúbida, este forma parte dos momentos especiais que queremos que viva toda a nosa Comunidade Educativa.

Adiviñas, contos cantados, historias de medo... hai moitísimos recursos nos libros e na nosa imaxinación! Agora tócanos seguir "xogando cos libros" na casa.

Grazas a todas as familias por estar! Vémonos na próxima!

CONTACONTOS CON CHARO PITA - 7 MARZO ÁS 18:00

Boas! 

Como ben sabedes, este ano estamos no programa LECTURAS E FAMILIAS e queremos convidar ás familias e compartir con nós momentos lectores.

A próxima semana, VENRES 7 DE MARZO, no centro cultural Nautilus de Santo André de Comesaña, temos a oportunidade de vivir unha tarde de lectura e contos con Charo Pita (escritora e narradora cunha gran traxectoria). Será ás 18:00. 

Compartimos a ligazón para anotarse: https://forms.gle/JMU7bftJaR6pUywW8 

Esperámosvos!

23 FEBREIRO - DÍA DE ROSALÍA DE CASTRO

No Párroco facemos unha gran homenaxe á escritora Rosalía de Castro, por ser unha gran defensora da lingua e da cultura galega.

Este ano, ademais da coñecer a súa vida e obra, lemos e ilustramos algúns dos poemas de Cantares gallegos e Follas novas. Escollemos aqueles nos que aparecían os meteoros ou fenómenos atmosféricos por estar relacionados co noso traballo do PDI.

Aquí podedes ver a 3ºEP contando a vida da poeta en forma de poemas:

E aquí a parte da ilustración de versos, estrofas e poemas:

Podedes escoitar os poemas na aula virtual:

 https://www.edu.xunta.gal/centros/ceipparrocodoncamilo/aulavirtual/course/view.php?id=376

13 FEBREIRO - DÍA DA RADIO

Grandes e pequenos, todos gozamos de gravar na nosa RADIO!

Por aquí deixamos algúns momentos no noso estudo de gravación. Que estaremos argallando? Moi pronto estará dispoñible en Radio Camilo!

CLUB DE LECTURA: PROBA FINAL!

 O club de lectura Estrelas da Lectura evitou onte un desastre na nosa escola 🛑 ⚠️🏗️💣💥📚. 

Resulta que fixeron fronte a unha situación moi semellante á que viviron os protagonistas do libro que leron nestes últimos meses. A biblioteca do cole ía ser derribada! Menos mal que son lectores hábiles e puideron salvar a nosa biblio dun desastre… 🛟📚 En equipo foron pasando as probas e rescataron a chave 🔑 da biblio e o cofre coas ideas 💡 do club!

Con este desafío pechamos este libro e comezamos unha nova lectura! 📖 🆕

A ver qué aventuras nos depara este novo libro… 💭💬

11 FEBREIRO - MULLER E NENA NA CIENCIA

 

Como cada 11 de febreiro, celebramos o Día Internacional da Muller e da Nena na CIENCIA. Unha data sinalada para recoñecer o papel fundamental que desempeñan as mulleres no desenvolvemento científico e tecnolóxico.

Na nosa biblio contamos con lecturas que achegan grandes científicas ás nenas e nenos do cole. Sabemos da importancia de ter referentes en tódolos eidos para que ninguén nos poña límites!