CONTOS DE HORTA E DE XARDÍN...COMEZAMOS!

 Non sin tempo agardabamos que deixase de chover para  poder sair a ler ó noso bosque-xardín-patio. A biblioteca iniciou esta semana unha procura de lectores dispostos a gozar a un tempo dos libros e da natureza. A lista de espera xa é enooorme!. 

Mentres os lectores preparan os contos de temática de horta e xardín, xa tiñamos uns espilidos candidatos agardando. Os nenos de 4 anos, co seu micrófono máxico, iniciaron esta aventura neste mes do libro contando ós compañeiros de 4º de primaria A horta de Simón. Son un expertos contadores que xa probaron na radio. Aínda así quixeron ensaiar e estreáronse con público na clase de 5 con Tomás o bromista e fixérono fenomenal!!! Chegada a hora de ler do venres, xuntáronse cos amigos de 4º baixo a sombra do noso liquidámbar e contaron esta interesante historia.

NOVO RETO NAS AULAS, TAMÉN PARA AS FAMILIAS

 Como sabedes levamos todo o curso mergullados no noso PDI arredor dos bosques e  das árbores do noso patio-xardín. Facemos conciencia sobre a importancia do coidado do noso medio de dous xeitos, achegándonos a el emocionalmente e aprendendo cousas sobre esta flora natural e as relacións con tódolos elementos do bosque. Coñecer para valorar, pero non é o único que podemos facer para aprender o valor de mimar ó noso planeta. 

Comenzamos agora un novo reto dentro do noso programa de Voz Natura no que nos gustaría contar coa vosa participación. Só tedes que contarnos algunha cousa das que facedes en familia para protexer o planeta e, daquela, a nós mesmos. 

Mirade como podedes participar. Calquera cousa que fagades, seguro que é importante. Animádevos!

#RETOPLANTAMOS

 Rematamos o mes de marzo cos deberes feitos...outro reto acadado!!!

DÍA DA ÁRBORE

 O 21 de marzo é un día sinalado no noso calendario de aula e máis neste curso no que estamos mergullados nun PDI arredor dos bosques e os seus ecosistemas. O mellor desta celebración foi facer coincidir o día cunha das plantacións nos nosos montes de Comesaña. Para os pequenos e 1º de primaria foi todo un acontecemento festivo. 

Pero foron moitas máis as actividades programadas para este día tan especial.

Unha delas aproveitar o bo día pra emocionarnos e redescubrir o noso xardín-bosque anotando os cambios que trae a primavera. Outra rematar a visibilización do proceso de apadriñamento das árbores. Cada aula escolleu xa no primeiro trimestre unha ou varias árbores do patio sobre as que facer o traballo experiencial e de documentación sobre o tema do PDI. Esa escolla podemos vela polo de agora nos corazóns que xa ocupan o patio e penduran das nosas árbores. A todos eles súmanse a oliveira de 5º e a árbore das bruxas de 6º, que aínda non lucen o corazón, pero pronto o terán.

A outra actividade de visibilización é continuar coa feitura nas escaleiras do bosque de árbores autóctonas galegas.  Este trimestre tocoulle á oliveira (protagonista do Día da paz), ó loureiro e mailo teixo. Todas estas árbores galegas forman parte do bosque-xardín do Párroco e acompañan a nosa vida na escola día a día. Tamén puidemos gozar delas (castiñeiros, cipreses, loureiros, camelios, oliveiras,..) localizando as palabras que lle adicou Rosalía, a de castro, homenaxeada no día do seu aniversario.

So algúns cursos puideron colorar e coloca-las folliñas no seu sitio; os que restan colocaranas na primeira semana de abril.

PRIMAVERA, PRIMAVERA...DÍA DA POESÍA

 Primeiro as agachadiñas e despois coma un estouro poético, o noso cole e mailo xardín cubríronse de mil e un poemas adicados a Rosalía, á beleza do bosque, as plantas e ... non si? á creación completamente libre. Copiadas de autores senlleiros ou creadas por nós; improvisando e xogando coas rimas; formando caligramas; recreando poemas coñecidos... Pequenos e grandes, argallaron un festival de primavera en galego e máis en castelán.Tódolos recunchos do cole compartiron eses momentos máxicos de homenaxe ás palabras harmoniosas e rimadas. As nosas árbores moi mimadas no PDI deste curso puideron tamén gozar destas emocións grazas ó bo tempo deste comezo de estación.

MES DE ROSALÍA, ÁRBORES E POESÍA

 Na radio, na aula stem, no traballo cotiá e na solta do Día da poesía o noso cole encheuse durante este mes cos versos de Rosalía, ademais de estar presente no xardín e nas árbores do patio, seguindo o traballo co noso PDI.

TRABALLAMOS NO PDI NO DÍA DA MULLER

 Podedes ver nesta presentación algunhas das cousiñas que fixemos para visibilizar e celebrar o 8 de marzo, Día da Muller pescudando sobre mulleres sotibles para o bosques e facendo medrar a nosa conciencia feminista e medioambiental. O noso traballo continúa!

RETO #AFORRAMOS

Durante o mes de febreiro traballamos de xeito especial no Reto#aforramos que nos propuxo Voz Natura. É algo que non nos costou esforzo porque xa a cotío traballamos así. Nos nosos proxectos de aula aproveitamos sempre material de fontes diversas para reutilizar nos obradoiros de plástica e matemáticas. Aproveitamos envases de todo tipo como almacenamento e apoio no traballo individual e grupal. Desenvolvemos iniciativas de aforro de enerxía de auga, calefacción e luz (apagamos cando non as precisamos, recollemos auga da chuvia, temos unha cubeta de lavado dos platos...)

Durante o entroido no noso laboratorio creativo de disfraces non usamos plásticos ou facémolo reutilizando materiais vellos, aproveitamos cartóns, papel de embalar usado nos murais, anacos de papel pintado das mostras, tubos de cartón, etc, para confecionar as nosas  creacións. Este curso tamén os mandados do meco foron satisfeitos con trebellos traidos da casa. 

Os obradoiros de Arts e gancho e tecido tamén aproveitan os cartóns e materiais doutros cursos para as súas propostas.

DÍA DA MULLER E A NENA NA CIENCIA. PRIMEIROS PASOS

 Primeiros? Como todos sabedes, a Ciencia sempre está presente nos nosos proxectos de centro e de aula e o desenvolmento do pensamento é un dos nosos obxectivos básicos, xa dende as aulas dos pequenos. O día "oficial" da muller e a nena na ciencia coincidiu nas vacacións, pero xa dende principio de curso vimos traballando a educación científica, a observación da natureza e dos procesos e a análise dos datos que imos recollendo.

Agardando o obradoiro de experimentos previsto para a primavera e as pescudas sobre científicas que desenvolveremos no Día da muller, os nenos de 4 anos adiantáronse e estimularon a súa curiosidade científica facendo experimentos coa chama dunha vela. Hipóteses e comprobación: o método científico.

Foi xenial!

 Os ciclos da vida e as interaccións serán outras das teimas nas que nos enlearemos na vindeira parte do PDI. Esta primavera adiantada do mes de febreiro trouxo de sorpresa na aula de 5 anos o nacemento prematuro dos vermiños de seda, sen case folliñas para lles dar de comer. Conseguiremos salvalos?. Estes observadores científicos xa pensan solucións. 

Seguiremos en tódalas aulas coas nosas pescudas e a nosa educación científica inclusiva e en igualdade!

LABORATORIO CREATIVO DE DISFRACES

Temos xa no blog Fonte dos frades as fotos da nosa Semana da troula acompañando ó Meco Cortizón Churruscón e da festa de entroido no Bosque Animado da fraga de Comeseñe. Imos ver aquí como as distintas aulas traballaron arreo para ter listos os seus disfraces.  Ao tempo os nenos e nenas de 5º e 6º traballaron literariamente na descuberta dun dos libros senlleiros da literatura galega e creando coplas e o tradicional testamento do Meco. As aulas enchéronse tamén de carautas e documentación arredor das máscaras tradicionais do entroido galego. Aprendemos de xeito activo, entrenamos distintas habilidades e mantemos as nosas tradicións. Todo en un! Parabéns a todos.